"Zeitindah Thlarau cun kan khah khawh lai?" (power 05)

Thiang Thlarau thiltikhawhnâk huham cu zûmtu dihlak caah co khawh sihmansehlaw zûmtu mi tlawmte lawng nih an nun in an tep ti cu el ding um loin a fiang mi a si. Cutiasi ahcun zeitindah Thiang Thlarau thiltikhawhnâk huham cu kan co khawh lai? Thiang Thlarau i khat dingin zeidah kan tuah lai? 

1. Na Tlinlonâk kha Cohlâng (Acknowledge Your Weakness) 

Thiang Thlarau thiltikhawhnâk huham i khat dingin mah tlinlonâk, sântlaihlonâk, `hawnlonâk i hngalh le i cohlân kha a herh. Rian`uan ding hal tikah leh a harbikmi biahalnâk cu na tlinlonâk, na saitlaihlonâk bik zeidah a si? ti hi a si. Cubantuk biahalnâk cu zeitindah na leh lai? Na tlinlonâk na chim a si ahcun na halmi rian na hmu kho lai lo. Bia an haltu sinah, “Ka tlinlonâk bik cu khiahmi cân ah ka phan manh lai lo,” “Ka `uanpi hawi he kan buai zungzal,” tiah chimin ruat tuah. Asinain chim hngami na ngei, zeidah na chim hnga mi hna cu? Rian kawlnâk website monster.com ah zoh law, kha bantuk biahalnâk lehning a phunphun na hmuh lai. Hitihin an ti: 

-Na tlinlonâk kha `hawnnâk caah thup. Hibangin na chim khawh, “Tlamtlin a duh tukmi ka si i voi hnih voi khat cu keimah sinâk nâkin sâng deuh le mi dang zong anmah sinâk nâkin sâng deuh in kai ruahchan tawn.” tiin. Asiloah “fak tukin rian ka `uan tawn i voi hnih khat cu ka tlinh lo tiangin ka `uan tawn,” tiin. 

-Na tlinlonâk kha hiti leiin na sinâk chimnak In dawh tein na hmaimilh khawh. . Hibangin na chim khawh, “Rian lawng lak a ruatmi ka si, asinain midang he `uan`i hi hmuitinh mi tlinternâk a sining ka hngalh cang,” tiin. 

-Na tlinlonâk tak tak zong cu chim ko, asinain na halmi rian he ai pehtlai theng lo mi si seh. Chawva cazin tlaih rian na dil ahcun mi khepkha, zaihmang na silonâk kha chim hlah. Bia an in halmi pawngah chimding bia kha kawl. 

Tlinlonâk thuh, tlinlonâk hmaimilh, tlinlonâk chim hrelhnâk hna nih khan rian na halmi hmuh khawhnâk ah an bomh zong a si kho men, asinain Thiang Thlarau huham thiltikhawhnâk hmuh khawhnâk an donh lai. A ngaingai tiah, Paul nih kan tlinlonâk kan pom, kan cohlân tikah Pathian cu kanmah lanin a thiltikhawhnâk huham kha a langhter tawn tiah a ti. “Anih nih ka sinah, “Ka zângfahnâk na caah â za ko, ka `hawnnâk hi derthawmnak ah hin dah kaw tlinter a si cuh,” tiah a ti. Cucaah Khrih `hawnnâk kha ka cung i a um peng nakhnga, lunglawm tein ka derthawmnak hna hi ka hmaihngalpi cang lai. 

Cucaah Khrih ruangah derthawmnâk, thangchiatnâk, chamhbaunâk, serhsatnâk le vansannak hna ah ka lawm tawn. Zeitintiah ka derthawm tikah hin dah kaw ka `hawn cu,” 2Kor 12:9-10). Thiang Thlarau thiltikhawhnâk huham i thomhmi si dingah cun kan tlinlonâk, kan derthawmnâk kha kan cohlân i kanmah fimnâk le `hawnnâk hmangin teinâk nun in ka nung kho hrimhrim lo ti kha kan hngalhfian le kan pom a herh. Kan tlinlonâk kan cohlân hnuah, Zisu kan panh lai i zumhnâk in Thiang Thlarau thiltikhawhnâk huham kha kan hal lai.

2. Zumhnâk in Hal (In Faith Ask) 

Thiang Thlarau thiltikhawhnâk huham i khat dingin Zisu Khrih kha panhin zumhnâk in kan hal a herh. Bawi Zisuh nih, “nannih misual hmanh nih nan fale kha thil`ha pek nan hngalh ahcun, van i nan Pa nih a haltu sinah Thaing Thlarau kha a pek lai ning cu?” tiah a ti (Luke 11:13). 

Ni khat cu pa pakhat nih an inn thlalang awng in a fapa te nih these cungah dirin lungtum ngan nawn cawi a timh lio kha a hei hmuh. Ngakchiapa te cu a tha a ba tuk i lungdongin a `hu. A pa cu inn lêngah a va chuak i “Fapa, zeidah a cang? Lungtum kha na cawi kho lo maw?” tiah a ti. A fapa nih, “Cawi kho lo,” tiah a ti. “~hawnnâk thazâng na ngeih khawhmi vialte na hmang maw?” tiah a pa nih cun a hal `han. A fapa nih, “Aw, hmang e,” tiah a ti. A pa nih, “Na hmang lo lawlaw, keimah naka hal lo cu ta,” tiah a ti. 

Cubantuk cu a si, Thiang Thlarau thiltikhawhnâk huham cu co khawh a rak si nain, cu thiltikhawhnâk huham co dingah kan awk a simi umchun cu kan tlinlonâk pom, cohlân le zumhnâk in hal cu a si. Zûmtu tampi teinâk nun ngei loin, nun niam tak takin kan nunnâk a chan cu Thiang Thlarau thiltikhawhnâk huham kan hal lo ruangah a si. Teinâk nun i nung dingin, a dawtnâk, a thiltikhawhnâk huham hngal dingin nifa te kan nun, ni fate kan chimmi le ni fate kan buainak ah Thiang Thlarau kan sawm a herh:

- Sual tuah dingin sualfawrhnâk ah na buai a si ahcun cu buainâk ah Thaing Thlarau sawm aw. Zumhnâk in, “Bawipa, na thiannâk tiah ti law nangmah ah a thiannâk an pekchih lai. Anih cu, “Thiannâk Thlarau” a si kha philh hlah, a thiannak cu nangmah ah a umter cawlh lai. 

- Lihchim le kongceihhmang na lei nih na nun an buaiter ahcun bia na chim tikah Thiang Thlarau kha sawm. Zumhnâk in, “Bawipa, na biatak” tiah ti law, nangmah ah biatak kha a umter cawlh lai. 

- Zumhlonâk ah na nun a buai ahcun cu na nun muru bak ah Thiang Thlarau kha sawm. “Bawipa, ka zumhnâk hi `hawnter,” tiah au law, nangmah ah zumhnâk kha a umter cawlh. 

- Thil pakhat khat ah, fimnâk bauin Pathian lungthin hngalhnâk kha bau in nai hngalh ahcun cu kongah Thiang Thlarau kha sawm, “Bawipa, na fimnâk,” tiah ti law, cun na herhmi fimnâk kha an pek chih lai. 

- Mi dang va dawtnâk nun le thlarau tlau dawtnâk nun ah chambau in nai hngalh ahcun, cu kongah Thiang Thlarau kha sawm, “Bawipa, na dawtnâk,” tiah au. Cuticun nangmah ah dawtnâk theitlai cu a tlaiter ko lai. 

- Mah le mah i uk khawhnâk chamhbau nun leiah na chambau. Tlaipi pi tiang na it, rawl tam tuk na ei asilolah Bible rel ding le thlacam dingah cân ngei manh loin na um, asiloah thawng`habia chim i manh loin na um ahcun, cu na hlawhchamhnâk na nun ca bakah Thiang Thlarau kha sawm. Anih nih na chamhbaumi mah le mah i uk khawhnak nun kha an pek ko lai. Zeiruangah? Zeicatiah anih cu “Mah le mah i uk khawhnâk Thlarau” a si. Pathian nih siter a duhmi zâmtu pakhat si dingin thiltikhawhnâk huham an pe khotu umchun cu Thiang Thlarau a si. 

Cuticun Pathian nih tuahter an duhmi kha na tuah khawh lai. Thiang Thlarau cu nifatin na nun caah na sawm lai lo maw? Na nun lamthluan le Pathian na biaknâk ah thiltikhawhnâk huham in pe dingin Thiang Thlarau cu na siang lai lo maw? Thiang Thlarau uknâk/control-nâk tangah minit kip, sehkan kip in nai `hum lai lo maw? Pathian nih na caah a `habik in khua an khanpiakmi nâk i niam deuh in nung hlah, a `habik in khua an khanpiakmi cu Thiang Thlarau khat nun hi a si. Thiang Thlarau khah nun in na nun tikah, na chungkhar le na kawhhran ah bettaling bak in thlengnâk a rak ken khawhmi hna hi ruat hmanh! Hi hna hi a rak ken khawh: 

- An chiatchuahtu ngaihthiam khawhnâk. 

- Na tei khawh lomi nun thup i na buainâk le na ngawlkhawhlomi thil tei khawhnâk huham. 

- Na hawi le na ral dawt khawhnâk. 

- Nan nupa nun a rawk cangmi `hatterkhawhnâk le na hawi he nan i `hennâk `hatter `hân khawhnâk. 

- Pathian nih an duhpiakmi minung si khawhnâk. 

- Pathian nih tuah ding i an duhpiakmi tuah khawhnâk. 

Thiltikhawhnâk huham co khawh a si, na tuah ding umchun cu zumhnâk in hal sawh sawh hi a si!

Note: Hi Rev. Dr. Rual Uk ttialmi "Thiltikhawhnak Huhman Hi Ngaih Khawh A Si" timi cauk chung in lakmi a si.