A. Catial in phaisa hmuhnak caah a herhmi thilri hna
Online in phaisa hmuhnak lam dangdang an um nain tutan cu Catial kong lawng chim ko rih u sih law mu.Online catial in phaisa hmuh a duhmi poh nihcun, Online ah anmah pumpak hmunhma (Site) pakhat khat an ngeih hmaisa a herh. Cucu a ngah khawhning phun hnih in a um:
1. Phaisa in website cawk i kan duhning tein website tuahtu dawr ah serter khawh a si. A man cu a phunphun in a um caah zeibantuk website na duh aa fian hnu lawng ah chim khawh a si hnga. Mitam bik nih hmanmi website pawl hi cu kum khat caah US dollar 300 in 1000 karlak man hrawng hi an si hna. Cawk na duh ahcun na umnak kiangkap ah website sernak dawr (or) an phone number online in kawl i hlat hlai khawh a si ko lai.
2. Phaisa dih lo tein online ah kan mah te in i ser khawhmi blog (website bantuk a si ve ko) an um ve. Hihi cu internet connection na ngeih ahcun na duh tik poh ah nangmah tein naa ser khawh peng. Phaisa cawkmi bantuk in duhning in tuah khawh a si lonak tampi nain catial aa thawkkaa mi ca ahcun phaisa cawkmi website nak in a that deuhnak zawn a tampi ve. Catial a fawi, admin page a dang in a um lo caah computer cung catial thiammi poh nih direct in tial thiam khawh colhmi a si. Cun, free tein ngah khawhmi a si caah sungh a um kho lo. Ser ve na duh ahcun keimah zong ruahnak hal khawh ka si ko.
B. Zeitindah Phaisa cu an hmuh kun?
Mah tein website/blog ngeih i Catial tiang cu kan i fiang cang nain ho nih dah phaisa a pek hna? Zeitindah phaisa an hmuh? timi kan i fian rih lo caah hun zoh ta than u sih. Phaisa hmuhnak lam a dangdang an um ve nain mizapi nih hman khawhmi le hman bikmi phaisa hmuhnak cu "Caw-ngia" (advertisement) in a si ko. Vawlei cung company ngan ngan, riantuannak ngan ngan le a phunphun nih vawlei cung mi vialte nih kan sermi. kan tuahmi le kan thilri hi rak hngal hna sehlaw kan caw hna seh, kan fuhpanh hna seh, ti an duh caah hi ca i phaisa tampi dih kha an ui lo; an ngamh ko.
Cucu mi vialte nih hmanmi Google, Facebook tbk. company hna nih an hngalh caah an thil caw-ngia khawhnak hmunhma an serpiak hna. Tahchunhnak ah, tu lio catialtu tam bik nih phaisa hmuhnak ah an hmanmi "Google Adsense" hna khi Google nih thil caw-ngia nak hmunhma ah an sermi a si cuh! Hi bantuk hmunhma ahhin, riantuannak buu phunphun thilri le riantuannak kha phaisa phalh in an caw-ngia piak hna. Cucu, a cunglei ah kan tialmi website/blog ngeitu vialte an website/blog ah caw-ngia langhternak nawl kha an pek ve hna. Nain mi nih lenkai lem lomi website/blog ahcun caw-ngia langhternak nawl hi an pe duh hna lo.
Na website/blog ah caw-ngia langhter ve na duh ahcun sawk (apply) tuah a hau. na sawk hnu ah, Google nih na website/blog an check lai i mileng an tam ko, a tlak ko an ti lawng ah an in cohlan lai. An in cohlan hnu mah "Ads Code" an timi te kha na website/blog ah na chiah lai i cu hnu ahcun caw-ngia phunphun na website/blog ah a lang lai. Cu bantuk in na website/blog ah a langmi "caw-ngia" cu na cabia a reltu hna nih an hmeh ahcun nang kha Google nih phaisa tlawmte an in pek ve. A tlawm taktak khi si! Voi 100 hmeh ah khin $1 hrawng an in pek lai. Aa cawn-be lo ngaingai!
C. Kan Nih Lai Miphun caah phaisa kawlnak tlak si ve maw?
Keimah ka hmuhning ahcun, nihin Lai miphun dirhmun caah hi bantuk in phaisa kawl hi riantlaih pakhat bantuk ngaingai i tlaihtlak a si lo nain riantuan pah, sianginn kai pah in va kemh chih awk ahcun a ttha ngai ko tiah ka ruah. Rum nak tlak cu a si har ngai lai, Laia reltu minung kan tlawm caah mu nain phaisa hmuhnak cu hmuh lo nak cun a tha deuh zungzal ti kha philh lo ding..
A duhmi nan tam ahcun "free blog serning le phaisa hmuhnak caw-ngia sawkning" ka ttial than te lai..
No comments:
Post a Comment