Biadomhnak:
Thawngtha chimtu tam deuh nih, Jesuh Khrih rat tthan hlan ah ralpi voikhat lawng a um cang lai, tiah an chim. Cu ralpi cu, 'Armegadon Ral' tiah auh a simi kum sarih harnak a donghnak i a cang te dingmi Ralpi a si, tiah an ti. Sihmanhsehlaw Bible nih Jesuh rat tthan hlan a chuak dingmi ralpi kong a chimmi tete ka zoh hna tik ah, Jesuh rat tthan hlan ah vawlei nih Ralpi pahnih a ton rih lai, tihi kaa fianning a si! Cucu zei ral le zei ral dah an si lai? Zeitindah an i thok lai? Zumtu nih tah, kan tong hna lai maw? ti pawl a tawite in hun zoh ta hna u sih.
A. Jesuh rat tthan hlan ah vawlei nih a ton dingmi Ralpi pahnih cu zei le zei dah an si?
Bible nih a chim chungmi nain nihin tiang vawlei nih a ton rih lomi Ralpi pathum an um. Cu hna cu: 01. Gog le Magog (Ezakiel 38), 02. Armegadon (Biathlam 16), le 03.Gog le Magog (Biathlam 20) hna hi an si. Armegadon ralpi hi cu kum 7 harnak a donghlei ah a chuak te dingmi a si, tiah zumh cio dih a si ko; buaipi awk a um lem lo!
Ezakiel 38 nih a chimmi "Gog le Magog" ral bal hi Biathlam 20 nih a chimmi "Gog le Magog" ral he aa khat, tiah mitampi nih an zumh. Zeicatiah an pahnih in "Gog le Magog" tiah auh veve an si; an min aa khat. An pahnih in aa khatmi an chim i hi ralpi hi Jesuh Khrih rat tthan hnu, kum 1000 pennak dihlei ah a tlung te ding a si, tiah an zumh. Sihmanhsehlaw Bible ttha te in kan rel tik ah, Ezakiel chimmi "Gog le Magog ral" le Biathlam chimmi "Gog le Magog ral" hi aa khatmi an si kho hrimhrim lo, ti a fiang ngaingai.
B. Zeiruangah Dah Aa Khat Lo Kan Ti Khawh?
1. Ezekiel nih a chimchungmi Gog/Magog raltuknak ahcun nichuah chaklei in dotu ralkap bu cu an ra i vawlei cung ram hna lakah zeimawzet lawng an i tel (Ezekiel 38:15, 39:2). Biathlam nih a chimchungmi Gog/Magog raltuknak ahcun vawlei khuazakip in an ral cu an chuak i, vawlei cung miphun le ram dihlak an i tel (Rev. 20:7-9)
2. Ezekiel chimchungmi Gog/Magog raltuknak ah Satan langsar in chimnak a um lo. Biathlam chimchungmi ahcun Satan kha hruaitu dirhmun in a langhter i a dih kum 1000 pennak a dih bakah a chuak dingin a chim (Rev. 20:7).
3. Ezekiel 39:11-12 ahcun ral kut in a thimi cu an tam tuk caah thla 7 chung vui an si lai, tiah a ti. Biathlam nih a chimmi raltuknak ahcun Thutdan Rang Biaceihnak nih direct in a zulh colh lai caah ruak vui a herh lai lo (Rev. 20:8-9, 11-15). Cun atu kan umnak vawlei le van hi vawlei thar le van thar in thlen a si colh lai (Rev. 20:1). Hi raltuknak hi kum 7 harnak aa thawknak leiah a chuah ahcun, duh zong duh lo zongah, miruak cu vui hrimhrim a hau lai zeicatiah kum 1000 chung cu ram ahcun a um rih ding an si (Rev.20:4-6).
4. Ezekiel chimchungmi Gog/Magog raltuknak hi cu a mi Israel miphun a mah lei kirter thannak caah Pathian nih a hmanmi a si (Ezek. 39:21-29). Biathlam chimchung Gog/Magog ral a thawh ahcun Israel cu kum 1000 chung an Pathian sinah zumhawktlak tein an um hnu ah a si cang lai. Cucaah hi pahnih hi cu an i dang hrimhrim ko. Pakhat cu an si hrimhrim lo. Biathlam 20 nih a chimmi Gog le Magog ral cu Dong lo khor chung in Satan an chuah hnu, kum 1000 pennak a dih hnu i Satan le Jesuh Khrih karlak dohnak a si, tiah fiang tein kan hmuh (Biathlam 20:7-8).
B. Asi ahcun, Ezakiel nih a chimmi 'Gog le Magog Ral' cu zeitik ah dah a thawh lai?
Bible nih a thawh ding caan fiang tein a chim chih lo caah, ka palh khawh men. Sihmanhsehlaw Bible nih hmun dangdang ah a chimmi zoh chih tik ah, hi ralpi hi mithianglawr hlan ah a chuak te ding si dawh bik a si. Matthew 24:14 kan rel tik ah, "Ni donghnak caan ahcun pennak thawngtha vawlei cung khuazakip ah chim a si lai" tiah kan hmuh. Kan ruah chih dingmi cu, Matthew 24 hi Jesuh nih a rat tthannak caan a nai cang, ti zeitindah kan hngalh khawh lai timi biahalnak he pehtlai in a chimmi a si. A rat tthan hlan, veel ngeihnak caan chungah hin, hi thawngtha bia hi vawlei cung khuazakip ah chim a si lai, tinak khi a si. Cun, Joel 2:28, Zachariah 12:10 ah "Ni donghnak caan ahcun "Pathian nih a Thlarau kha mi vialte sin ah a thlah a si lai" tiah a ti ve. Hihi pentecost Ni ah a muisam hmuhter kan si cang nain a taktak cu a tling rih lo; hmailei caan ah a tlung ding a si rih!
'Vawlei cung khuazakip thawngtha bia phuan le mi vialte sin ah Pa Thlarau thlah hnawh' timi hi veel ngeihnak caan chung ah a ang hrimhrim ding an si. Veel ngeihnak caan a dih hnu ahcun, vawlei cung ram vialte Gentile miphun caah Pathian Thlarau co caan a dih cang lai cuh! Mah hi thil lian taktak, Pathian riantuannak mak-da-duai pi hi, chum cung Jesuh rat tthannak (thianglawr) hlan ah kan hmuh rih dingmi a si.
Hi thil lian nganpi hi, Pathian nih Ral nangpi kut in a miphun Israel ram, zahmuh cio khawh awk in a khamh lai nak caan in aa thok lai, tiah zumh a si. Keimah zong nih ka zumh. Cu ralpi Russia hruaitu ram tampi fawnh ralkap buu nih Israel ram kan hrawh dih lai, tiah an doh caan a si te lai! Russia hruaimi ralkap buu nih Israel kan hrawh dihcikcek lai an ti lio ah, Pathian nih khuaruahhar in a khamh hna lai.
Cu Pathian riantuannak lian ngan nihcun vawlei ah a donghnak amah sin kir tthannak caan, Thlarau thanghnak ngan taktak a chuahter lai. Cu hnu ahcun mithiang lawrcaan cu a si te lai. Hi ralpi hi cu kan nih zumtu zong nih kan ton manh ve te men lai. Armegaon ral cu Jesuh van raang tiang a rat (thianglawr) hnu ah a si nain a taktak rat tthannak (second coming) hlan deuh ah a si lai. Cucaah Jesuh a voihnihnak rat tthan hlan ah, vawlei nih ralpi pahnih a ton rih lai, tihi Bible cawnpiaknak a si ko, tiah ka ruah. Na ruahning aa dan ahcun comment ah na langhter khawh..
Gog le Magog Ralpi: Prophet Chimchung Bia a Tling Cuahmah timi ka capar hlun zong rel khawh a si.
No comments:
Post a Comment