An riantuanning aa khah ko caah, mizapi nih kan theih khawhmi biafang "website" hmang ko ning lawi. Tuan deuh ka capar ah Online in phaisa hmuh duh ahcun website ngeih a hauhnak kong ka tial cang khah. Website phun hnih in a um; phaisa cawk hau le phaisa cawk hau lo an si. Phaisa cawk hau hi cu, kan cawknak ah serter colh awk a tthat ko caah keimah nih tial len hau lo; a thiam zong ka thiam lo. Online ah man lo tein ser khawhmi website serning cu tawi tein ka hun tial lai. Mah zong ahhin phun dangdang an um nain a dihlak kan telh cawk lai lo caah Blogspot serning lawng ka langhter lai.
A. Na Ser Hlan ah naa ready cia a herhmi tete
1. Gmail ID cu na ngeih hrimhrim a herh.
2. Na website min kha naa ruah cia a herh lai. Website min ahhin pahnih a um. Pakhat cu duh poh in thlen khawh a simi Blog min pi khi a si, a dang pakhat cu thlen khawh a si ti lomi domain min www.hrambiklian.blogspot.in ti bantuk pawl khi a si. A pahnih ca in naa ruah cia a hau lai.
B. A website Serning step by step tete in
1. https://www.blogger.com/ hi te google ah khan tial law a tanglei photo bantuk khin "CREATE YOUR BLOG" timi na hmuh lai.
2. "CREATE YOUR BLOG" timi zawn hi hmet law Gmail/email ID in login tuahnak a chuak lai.
3. Na email ID login na tuah dih bak ah a tanglei photo bantuk khin thil pathum na hmuh lai:
1."Blog title" (hi kaa ahhin na blog min pi na tial. Hi min hi thlen khawh lengmang a si).
2. "Address".(mynewblogaddress.blogspot.com tiah tahchunhnakte an pek cia lai. Hi tahchunhnak i a donghnak lei ".blogspot.com" hi cu amahning khin tial a si lai. A thoklei i "mynewblogaddress" timi zawn ah khin thlen ti lo dingmi na blog min cu na tial cang lai. Na tialmi kha a rak um cangmi a si khawh caah a ngah lo ahcun zahte (V) a chuah tiang a herhning in na thlen piak lengmang hau lai.
3. "Theme" (Theme timi zawn ah, kan website muisam duh duh in i thim awk an chiah ciami an um hna. Naa thok kaa ahcun "Simple" timi khi hmet ko. A hnu ah thlen khawh peng si ko).
4. A tanglei te ah a ummi "Create Blog" timi khi hmet. Mah na hmeh dih bak hin na blog cu aa ser cang dih cang. "Welcome" etc. ti pawl na hmuh hna lai. Mah dih khan na website a cunglei na email ID a langhnak te kha hmet law logout tuah phot.
5. Na logout dih in Google ah khan a hramthok na rak tialmi https://www.blogger.com/ kha tial than law a cunglei a chirte i a ummi "Login" timi kha hmet law na email ID khan login tuah than.
6. Na blog chung ah a tanglei photo bantuk khin tampi na hmuh lai.
7. "New Post" timi te khi hmet law catial nak pi a rak chuak colh lai. Na tial duhmi a tlangtar kha a cunglei i "post title" timi zawn ah khan tial law na capar kha a tanglei a ngannak pi ah khan tial ko.
Hi kaa zawn hi caw MS word hman bantuk khi si ko.
8. Na tial dih tik ah, orhlei kam a cunglei ah a ummi "Publish" timi khi hmet law na capar cu aa tar colh ko lai. Photo ka tar chihmi hi rak i zoh chih ko u.
Nan fianlonak um ahcun ka FB ah pehtlaih khawh ka si peng ko lai..
No comments:
Post a Comment