"Thlarau Khah Lo Hi Sual A Si.." (power 01)

Paul nih, “Thlarau tu in khat deuh uh,” tiah a ti tikah nawl a pekmi a si. Hi nawlpek hi lei cungah lungthawhtertu bik thawng`ha a si, zeicatiah Thlarau thiltikhawhnâk huham pek cu zûmtu caah Pathian saduhthah a si lawng si loin, Thiang Thlarau thiltikhawhnâk huham zong co khawh a si timi hi lungthawhtertu tak tak a si. Zulh khawh a si lomi kha zul dingin Pathian nih nawl akan pe hrim hrim lai lo ti kha hngal. 

Hi Baibal câng ah hin nawlpek pahnih kan hmuh. A pakhatnâk cu, “Misur hang kha ri hlah u,...” (Efe 5:18a) ti a si i a pahnihnâk cu, “..Thlarau tu in khat deuh u,” (Efe 5:18b) ti hi a si. Thlarau in khat u timi nawlpek nunpi lo hi ai za tawh in um u timi nawlpek nunpi lo he ai lo ti hi na hngal maw? Bawipa Ni ah biaknâkinn i pumhnâk ah nan pastor asilole pumh hruaitu kha zuri in biakinn chungah pai cutmat in lut sehlaw poi na ti lai lo maw? Biaknâkinn ah a rami vialte nih poi kan ti cio lai i inn leiah tlung cio in cu kong cu sau nawn kan chim cio lai tiah ka zumh. 

Asinain Pathian mithmuhah cun zûmtu zuri le zûmtu Thlarau i khah lo hi aidannâk a um lo. Thlarau khah le Thlarau thiltikhawhnâk pek ti mi hi nangmah duhthimnâk ah a ummi a si. Zurit asilole lungfim te i um kha nai thim khawh bangin, Thlarau khah asilole Thlarau khah lo hi nangmah thu thu a si, na duhthimnâk a si. A ngai ngai ti ahcun na duh tik pauh ah, na duh câncân ah Thiang Thlarau thiltikhawhnâk hi na co khawh. 

A sullam cu kan thlarau lei nun dernâk kongah puhmawh ding kan ngei lo tiknâk a si. Efe 5:18 bia he pehtlaiin C. H. Spurgeon nih, “Hihi aupi ding biakam a si lo, nunpi ding nawlpek a si deuh,” 6 tiah a ti. Sual timi cu Nawlbuar a si (1John 3:4) caah, Thlarau khah ding kan si ti kha kan hngal ko nain, kan khah lo ahcun sual a si. Bible nih, “Cucaah thil ṭha tuah ding hngal ko nain a tuah lo ahcun a caah sual a si,” (James 4:17) tiah a ti.

Note: Hi Rev. Dr. Rual Uk ttialmi "Thiltikhawhnak Huhman Hi Ngaih Khawh A Si" timi cauk chung in lakmi a si.