Zeiruangahdah Thiang Thlarau i khat dingin nawlpek kan si? Thiang Thlarau i khah lo cun Kristian nun i nun khawhnâk thazâng le thiltikhawhnâk huham a um lo caah a si. Cucu Khrih nun zongah a dikmi a si. A ngaingai ti ahcun lei cung i Zisu rian`uannâk zong kha Thlarau in a khah hlanah a `uan lo lawlaw (Luke 3:21-22), lei cung a um lioah a tuahmi thil vialte hi Thiang Thlarau i khat Pathian- minung dirhmun in a tuahmi a si. Peter nih kan Bawipa Jesu nun hitihinn a chim:
“Nazareth Zisu, Pathian nih Thiang Thlarau le thiltikhawhnâk in chiti a thuhning le thil`ha kha tuah in khual atlawng ikhuachia serhsarhmi vialte kha a damter hna, zeitintiah a sinah Pathian a um,” (Apo 10:38) tiin.
Zisu nih a hnuzultu hna kha Thlarau i an khah hnu lawngah a hman hna. Apo 1:4-8 i Zisu nih a zultu hna sinah, “Jerusalem chuahtak loin, Pa biakm kha hngak dingin...Thiang Thlarau nan cungh a phak tikah, huham nan co lai; cuticun Jerusalem ah, Judia peng pumpi ah, Samaria ram dihlak le vanhram deng tiangin ka biahngaltu nan si lai,” tiah a ti mi kha philh hlah u. Apo 2:4 ah, “..an dihlak in Thiang Thlarau in an khat,” tiah kan hmuh. Thiang Thlarau in an khah hnu lawngah thawng`habia chim an thawk a si lo maw. Kawhhran nih hruaitu karhter a herh tikah, Apo 6:3 nih akan chimh, “Thiang Thlarau in a khatmi” kha an kawl. Jerusalem kawhhran nih An`iok kawhhran i rian`uantu thar cah mi an kawl tikah “Thiang Thlarau in a khah caah Barnabas kha an thim (Apo 11:24).
Thiang Thlarau thiltikhawhnâk hmangin kan tuah lo mi pauhpauh cu thlarau lei le zungzal caah cun zeihmanh `hathnemnâk ngei lo an si ti na hngal maw? Cucaah Jesu nih, “Nuntertu cu Thlarau a si, taksa cu sân a tlai lo,” (John 6:63) tiah a ti. Thiang Thlarau khat lo pi in, Bawipa caah nun le Bawipa caah rian`uan kan timh tikah, kan nun, kan rian`uan, kan cawlcanghnâk le thawng`habia kan chimnâk hna cu thiltikhawhnâk um lo le theitlai ngei loin an um. Amah tel lo i tuahmi pauhpauh cu Pathian nih a cohlâng bal lo i nangmah lan in a tuahmi thil lawng Pathian nih thluachuah a pek ti hngalh hi thil biapi tuk a si. Abraham fapa Isak kum 25 a tlin tikih thil a cangmi kha na hngal ko rih lo maw? Pathian nih Abraham sinah, “Anih nih, na fapa, fapa ngeihchun na dawt tukmi, Isak hrimhrim kha i kalpi law Moriah ramah kal, cuka ah kan hmuhsak laimi tlâng pakhat ah khanghthawinâk ah na pek lai,” tiah a ti (Hra. 22:2).
Zeiruangah Pathian nih Isak kha na fapa ngeihchun tiah a ti ti hi na khawruah a har bal maw? Zeiruangah Pathian nih Ishmael kha a hlawt i Isak lawng a cohlân hnga? Zeicatiah Ishmael cu Pathian tel loin Abraham tuahmi a si. Abraham cu Pathian cungah i `humh dih kha a duh lo i amah tein a cawlcâng, cuticun a sinumnu Hagar cu fa a pawiter. Pathian tel loin hrinmi fapa a si caah Ishmael cu Pathian nih a hlawt. Amah cungah i `humh i tuahmi lawng Pathian nih a cohlan i laksawng a pek. Cucaah Zisu nih, “..keimah loin zeihmanh nan tuah kho lo [zungzal nguhmi thil],” (John 15:5b) tiah a ti. Phun dangin kan chim ahcun Thiang Thlarau thiltitkhawhnâk huham tel loin tuahmi pauhpauh cu zungzal caah santlaihnâk an ngei lo.
C. H. Spurgeon nih a caukLectures to My Students timi chungah puritan Thomas Boston mang kong a `ial. Thomas Boston nih a mang ah khua chungah a kal lioah lam kam ah Sehtan phung a chim len kha a hmuh. A pemhmi cu fundamentalist a si hi ta thawng`ha bak a chim ko, mibu sinah Baibal cu a palh kho lo a si tiah a zumhnâk kong zong a aupi. Thomas Boston cun a va panh i “Sehtan na si maw?” tiah a hal. “Ka si ko” tiah Sehtan nih a leh. “Thawng`habia na phuang maw?” tiah a halchap i Sehtan nih, “Si, thawng`habia tak tak ka phuan,” tiah a ti. Thomas Boston nih, “Zeiruangah thawng`habia cu na phuan,” tiah a hal `han i, “Zeicatiah minung hna hi thlarau leiah hnachet ko tuahnâk hriamnam `habik cu Pathian chiti thuhnâk tel lo i thawng`habia phuanter hi a si ti kha ka pemh cang,” tiah a leh.
Spurgeon nih cu kong ka rel tikah ka ther thluahmah tiah a ti, kannih zong ther ve ding kan si. Thiang Thlarau khat loin Kristian nun i kan nun ahcun, kan nun lamthluan ah kan tuahmi thil kip le kan rian`uannâk hna cu thiltikhawhnâk huham um lo le santlaihnâk ngei lomi an si.
Note: Hi Rev. Dr. Rual Uk ttialmi "Thiltikhawhnak Huhman Hi Ngaih Khawh A Si" timi cauk chung in lakmi a si.
No comments:
Post a Comment