Zumlotu hna nih Pathian a um lo, tiah vawlei thilsining cherhchan in an ti tikah, Bible cherhan in leh awk an ttha lo. Zeictiah Bible hrimhrim hi Pathian bia a si ti an zumh lo caah, Bible nih a ti timi cu an nih caah sullam zeihmanh a ngei lo.
Cucaah, an biahalnak kan leh hna tikah, vawlei tuanbia le thilsning nih a cohlan vemi fact hmang in Pathian a um zia langhter ve kan hau. Nizan ah biahalnak point 3 kan tuahmi chung in, a pakhatnak lehnak tawi tein ka hun ttial lai.
Question: 1. Pathian a um taktak ko timi langhterkhotu, mithmuh kuttongh tehte piah awk pakhat hmanh a um lo caah, Pathian a um ti a zummi hna cu tehte a ngeih lo hngalh ko buin biaceihnak ah teinak a petu biaceihtu bantuk an si, tiah an ti.
A. Pathian a um lo, ti chim cu a fawi nain vawlei tuanbia ah Jesuh a um lo ti cu hohmanh nih an chim ngam bal lo.
Zeicatiah Jesuh Khrih cu kum zabu pakhat (1st century) lio vawlei ah, a rak um taktakmi, khuaruahhar thil tuahtu le cawnpiaktu lian-ngan tiah vawlei tuanbiapi nih a theih i a cohlanmi a si.
Jesuh vawlei tuanbia ah a um ko, ti zumh ko ttung i Pathian a um lo tiah zumh tthan ttung cu, tehte zatawk an ngeih lo ruang i zumh lo siloin zumh an duh caah an zumh lo biatu a si deuh.
Jesuh cu vawlei tuanbia ah a um ko, tiah an zumh ttung i cu Jesuh cu hodah a si, tibal zumh duh ti lo cu lungkhawn le thilhman cohlan duh lo sawhsawh a si! Jesuh khrih hi vawlei tuanbia ah a um taktakmi a si, timi pakhat hmanh hi Pathian a um taktak timi tehte caah a za cang.
B. Pathian a um lo, tiah a zumtu hna nih khuachia (devil) vawlei ah a um, tihi an cohlan dih.
Khuachia a um taktak ti cu mithmuh kut-tongh in piah awk tehte tampi zumlotu zong nih an ngeih. Khuachia a um ko, tiah kan zumh ahcun cu khuachia he tthen a rak simi Khuattha (vancungmi) an um ve ti cu zumhchih lawlaw a hau. Vancungmi an um ti zumh ahcun, Pathian a um ti zong zumh chih lawlaw a hau ve.
C. Pathian a um lo tiah zumh cu a fawi nain kan vawlei le a chung thil vialte hna sertu an ngei lo, anmah tein an chuak timi zumh hi thil har taktak a si; a tehte piah a har tuk!
Zeidang thil nung vialte hi cu, vawlei det le zeidangdang cawh in, anmah tein an chuak tiah Pathian zumlotu hna nih nal ngai in an chim khawh ko. Nain cu vialte chuahnak hram ah an chiahmi vawlei dat cu khuazei in dah a chuah? timi kong ahcun an nal kho ti lo.
Van arfi nganpi a rak puak i cu a puakmi pelpawite pakhat cu atu kan umnak vawlei ahhin aa cang, tiah an ti. A si ahcun, cu a rak puakmi Arfi nganpi cu khuazei in dah a chuah, timi biahalnak cu an nih caah zeizong vialte donghnak ah aa cang ai; sihmanshelaw cucu zeizong vialte aa thawknak Pathian kut cu a si cang!
Cucaah Pathian a um lo tiah a zummi scientist pawl nihcun, Pathian ser ciami thil cherhchan in zeitindah hi thil aa semning a si timi study an tuah i thil zeimawzet aa seming an hngalh khawh. Cu bantuk thil hngalh khawhnak ding cherhchan caah an hmanmi thil vialte khi a um ciami lawngte an si. Pawkpalawng chung in anmah te nih an i serchawmmi zeihmanh a um lo.
Cucaah Pathian ser ciami thil hmang riangmang in, sertu Pathian a um lo tiah an aupi. Cucu ningzah hngalh lo bia a si! "Nuci le paci aa ton tikah naute a sem" timi hngalh khawh ruang i Cii chuahtertu nu le pa a um lo (a herh lo), tiah au len bantuk khi a si ko.
Cucaah Pathian a um lo timi a zummi hna hi, Pathian a um ko tiah a zummi hna nih mithmuh kut-tongh tehte zawtawk kan ngeih lo caah siloin an hmuh ko nain an zumh khawh lo ruang le Satan nih hmu kho loin an mit a huhpiak hna ruang sawhsawh ah an zumh lomi tu a si, tiah kei nihcun ka ti....
No comments:
Post a Comment