"Thiang Thlarau Huhman cu zeiruangah dah a bia pit?" (power 08)

Hi baptisma, huham i thomh asiloah Thlarau i khah hi a biapi tuk hringhran, loh khawhloin a herhmi zong a si. Cu thil an co hlanah lamkaltu hna kha Bawipa rian`uan an thawk lo, thawk lo dingin an Bawipa Zisu nih a chimh hna. Zisu nih, “Jerusalem kha chuahtâk loin, Pa biakam kha hngak dingin nawl a pek hna,” (Apo 1:4). Minung lei zohnâk ah cun lamkaltu hna nih zeizong vialte an rak theih dih cang a lo nain! Vanharm deng tiang thawngtha phuang dingin ai tim cangmi an lo nain! Lamkaltu hna cu khamhnâk a comi an si, an chungah Thiang Thlarau umpinâk a co cangmi an si. Bawipa Zisu a thawh`hân hnu ni thum ah Zisu nih an cungah thaw a chuahhnawh hna i, “Thiang Thlarau co u,” (John 20:22) tiah a ti. Hihi hmuhsaknâk asiloah hmailei cân ah Thlarau an co lainâk kong chimchungnâk a si lo, cunâkin kha cân thengte ah khan Thiang Thlarau umpinâk an rak co kha a si deuh. Lamkaltu hna hi hmuhtonnÎk a ngeimi an si. 

Kum thum le a cheu chung Bawipa Zisu he an um`i, khual an tlawng`i. Thil umtuning an hngalh dih. Zeibiadah chim ding, mibu kha zeibantukindah va nawr ding ti kha an hngalh, zeicatiah thawng`habia a chimnâk ah Bawipa Zisu sinah an um zungzal ve ko (Mat 9:35-38). Lamkaltu hna kha hi cawnnâk hi a ngeimi an si. Kum thum le a cheu bak Zisu ke hramah an cawng. Ni 40

chung Zisu a thawh`han le van a kai hlanah Pathian pennâk kongah training an kai `hiam `hiam (Apo 1:3). Vawlei nih a herhmi biacah cu anmah lawng lawng nih an ngei. Bawipa Zisu nih Lamkaltu sin dah ti lo mi dang aho sin hmanhah khamhnâk biacah a kenter hna lo. Annih cu khamhmi, Thlarau umpinâk, Bawipa Zisu he a umkalmi hmuhtonnâk a ngeimi, Bawipa Zisu sianginn ah a cawngmi le vawlei nih a herh bikmi khamhnak biacah ngeitu umchun si hmanh hna sehlaw vanhram deng tiang thawng`habia chim i kal dingah an i manh lo, an tling rih lo. Thil pakhat te an bau rih. Thiang Thlarau huham kha an bau ko rih. Lamkaltu hna caah Thlarau umpinâk lawng hi a za lo. Thlarau huham an herh. Thiang Thlarau i khah le huham i thomh kha an herh ko rih. Thiang Thlarau i an khah hnu lawngah thawng`habia phuan kha thawh a si (Apo 2:14,41). 

Thawng`habia phuang dingah tlinnâk tlamtling a ngeimi Lamkaltu hna hmanh Thiang Thlarau i khah le huham in thomh an herh ko rih a si ahcun, kannih nih zeitlukin dah cu huham i thomh le Thlarau i khah cu kan herh chin chin lai? A ngai ngai ti ah cun, Pathian nih a rak hmanmi pauhpauh hi Thlarau i a khatmi an si. “Thlarau in a khah” (Apo 7:55) hnu ah, Stefen kha thawng`habia hmangin Jerusalem nawrtu dingah Pathian nih a hman. “Thlarau in a khah” (Apo 9:17) hnu ah Paul kha Pathian nih thawng`habia phuangtu ah Pathian nih a hman. “Thlarau ih a khah caah” (Apo 11:24) Barnabas kha Antiok khualipi thawng`habia hmangin nawrtu ah Pathian nih a hman. A kum 45 ah Jonathan Goforth cu missionary hlawhtling a si. Minung tahnâk le cuanhnâk in mi hlawhtling a si ko nain, Bawipa Zisu nih John 14:12 i a kamhmi “a liangan deuhmi kha” hmu dingin a hâl hringhran. Thawng`habia ruang i mi nih khamhnâk an comi fangfang ah khan a di a riam kho lo. 

Cu lioah Wales ram i Thiang Thlarau cawlcanghnâk kong `ialnâk ca fate kha a rel. Cutikah Thiang Thlarau huham hngalh duhnâk in a khat chin chin. Cuticun Jonathan Goforth cun Bible pakhat a cawk i Thiang Thlarau kong kha `ha tein a dothlat. Zingka tein a tho i dawnkhantu um lo lioah tiin a Bible cu a dothlat lengmang. A ngandamnâk a `ha lo sual lai ti phângin a nupi nih ni khat cu, “Na thil tining hi hla tukah na kal deuh a si lo maw?” tiah a ti. A khukbilnâk in a hung tho i a nupi lei cu a zoh i hitihinn a ti, “Oh, Rose, na theithiam lo e! Lung mantam hmutu mirum bangin dah kaw kai ruah. A mak tuk. Oh, Mi dang zong nih hmu ve hna sehlaw ka duh,” tiah a ti. Cu cân cu an nu nih a philh kho lo. Cubangin Baibal a dothlatnâk theitlai cu zeidah a si? Thiang Thlarau in a khat. Cu Thlarau i khahnâk theitlai ta zeidah a si? Zan khat cu Goforth thawng`habia chimnâk ah phundang ngaiin thil a um, cubantuk cu a tawng bal lo. 

Thu a chim tikah sual hngalhnâk mithmai kha biangaitu hna hmaiah a lang. Biakhiahnâk tuah dingin a nawl hna tikah, an dihlakin an tuah. Mi pakhat a ra i Goforth sinah dintein, “Unaupa, hibantuk phungsimtu chuak dingin thla kan camnâk a rau tuk cang, tuzan i huham a um hi kan thlacamnâk theitlai a si,” tiah a ti. Kha cân hrawngah Goforth phung a simnâk hmun kipah mi nih khamhnâk hmuh duhin an kawl. Cucu kan herhbik mi Thiang Thlarau baptisma le Thiang Thlarau khah le Thlarau huham i thomh cu a si. Cucu A. W. Tozer in fim ngaiin, “Thiang Thlarau hi Biakam Thar kawhhran in lak hei si sehlaw an tuahmi 90% cu ai din lai. Asinain tuchan kawhhran in Thiang Thlarau lak hei si sehlaw an tuahmi 10% lawng ai din lai,” tiah a ti. Kawhhran hmasa rian`uannâk i a langmi theitlai bantuk nihin i kan hmuh lonâk chan hi an i `humhnâk huham cungah kan i `humh ve lo ruangah a si ko hnga lo maw? Asinain, kan hngalh ding a simi cu: cu huham thiltikhawhnâk – Thiang Thlarau huham cu nihin i kawhhran caah co khawh a si ko rih ti hi a si.

Note: Hi Rev. Dr. Rual Uk ttialmi "Thiltikhawhnak Huhman Hi Ngaih Khawh A Si" timi cauk chung in lakmi a si.