Nai hrawng kan vawlei a hnin dihtu thawngpang pakhat cu Saudi Arabia cozah zung chung ah thah a tongmi, journalist minthang Pu Jamal Khashoggi kong a si.
An nih hi Saudi Arabia rampi a rak dirhtu siangpahrang Abdul Aziz Al Saud nih a mah pumpak doctor ah a rak hmanmi pa i tupa a si. Kan hngalh fian khawhnak hnga, A.D 1997 lio i England siangparang nu Diana he an zamnak ah a thimi Dodi Fayed te chungkhat unau a si. An hrihhram a tha, bawi lungput a ngeimi a si ve caah atu lio Saudi Arabia cozah a doh ngaingai tu a si.
A nupi hmaisa he an i tthennak catlap lak ding in Saudi cozah zung i a va luh lio ah thah a ton hi a si. A thihnak kong hephtlai in vawlei cung ram nganpi pi nih fakpi in an aw-an a chuah cio, US zong nih a tlerh khawnh pah len hna. Saudi cozah kut a si ko tiah sual an puh dih!
Sihmanhsehlaw hi kong ahhin US telh in, nitlak lei ram pawl nih Saudi cozah dantatnak pek an duh lo; phaisa sungh lai phan ruang ah!
Saudi Arabia ram hi US caah ram biapi taktak a si:
1. Saudi ram hi vawlei ah datsi/zinan (oil) tam bik a chuahtu ram an si caah US nih sipuazi in dan a tat ahcun datsi/zinan man a let in a kai lai ti a si.
2. Saudi hi vawlei cung ah hriamnam caah budget a hmang tam bik changtu an si. US sin lawng hmanh ah $110 billion man hriamnam cawk ding min an thut cang. US nih sipuazi in dan a tat ahcun cawk a timhmi vialte hi a cancel lai i China le Russia sin ah a cawk lai.
3. US le Saudi ram sipuazi an tuahtinak phaisa hi kan hnu kum ah khan $46 billion a phan. Cu riantuannak nihcun US ram chung ah rian tuan awk ting tampi a ser. Cucaah US nih Saudi hi sipuazi in dan a tat ahcun US ram chung ah rian tampi a zawr lai.
Hi vialte ruang ahhin, US president Donald Trump nih "Saudi ram nih journalist Jamal Khashoggi thihnak kong ah fianternak an tuahmi cu ka lungtling bak lo. Sihmanhsehlaw phaisa tampi hmuh khawhnak rian kan tuantimi vialte hi thil pakhat ruang i rawhter dih cu ka duh lo.." tiah a chim.
A fawinak in chim ahcun, minung pakhat thihnak ruang ah Saudi ram dattat i phaisa hi vialte sungh cu ka duh lo, tinak khi si ko.
Zei buainak hmanh a um lo lio ahcun "rumnak in nunnak a biapi deuh" ti cu a fawite. Kanmah thihnak ding kong taktak ahcun "chawva sungh cu nunnak sungh nak cun a tha deuh tuk..." kan ti khawh cio nain midang cung ahcun cu bantuk lungput ngeih cu a har taktak.
Mizei hmanh nih kan tuah khawh cio ka zum lo; nain Jesuh nih a kan fialmi cu cu bantuk dawtnak midang cung i va ngeih khi si dawh a si.
Midang thihnak, nunnak, ningzahnak, ngaihchiatnak le lawmhnak kong kha kan mah thihnak le nunnak, ngaihchiatnak le lawmhnak kan ruah tluk in kan ruah ve ahcun vawlei ah buainak a dong lai; vancung nun a lang ko lai!
No comments:
Post a Comment