Kan hnu zarh ah khan US ram Texas state, Austin ah Alfred Norwood Jr. timi pa cu motor in aa chawk. Ruah lopi in inn pakhat dot hnihnak cung in mipa aa thlai ko kha a hmuh i zokzok tein a motor a dirter.
Khamh a timh, kaihlaak an donhmi kai aa tim lrn nain a kai kho lo. Inn cung dot hnihnak in aa thlaimi pa cu ka khamh manh sual lai lo ti a phan tuk caah kiangkap a hmuhmi minung kip a auh hna, bawmh a hal hna nain ho te nih zei ah an rel piak lo.
Cucaah lau ngai in palik a call hna. Palik cu khulraang in an rak phan i inncung in aa thlaimi pa cu an zoh tikah minung taktak siloin inn ngeitu nih Christmas lawmhnak caah an inn an ttamhnak mipa lem a rak si ai!
Cu kong cu inn ngeitu nih an theih tikah lung lawmhnak in an khat i a sinah lawmhnak bia an chim. Cu kong a theimi minung poh nih an lunglawmhnak an langhter cio.
Mi pakhat nihcun: "Vawlei ah mitha le midang zawn a ruat taktak tu minung an um ve ko rih, ti hngalhtertu a si.." tiah a ti.
Kum zabu 19th thawngthachim minthang Spurgeon nihcun "na min kha lungpi cung ah siloin minung lungthin tu ah va tial" tiah a rak ti.
A miak hmuh ding ruahchannak ngei bak loin midang caah kan tuahmi thil tha cu minung lungthin chung ah aa tial caah a tlau kho ti lo; zungzal tiang a hmun!
Dawtnak mangtaam nih vawlei a den cang caah mi beidong hna nih dawtnak, zawnruahnak le zaagfahnak pur an phiarnak hmu si i zuam hna u sih!
No comments:
Post a Comment