“Kan fale ruah ko ah phanh kan duh..” kan ti lo maw kha?

Kan hnu thla ah khan Rev. Dr. Rual Uk nih kan khrihfabu ah zarh hnih chung Bible cawnpiaknak a kan ngeih. Zarh hnih chung ah voi tam nawn a nolhmi  bia tampi lakah pakhat  cu “ka fanu le ka fapa le hna US ram an kal lomi hi cu kaa lawm lawm lawlaw…” ti a si. Hi tluk in sual phun kip, Bible cawnpiaknak ralchanhtu nunzia a tamnak hmun i ka fanu le fapa thanter cu ka ttih tuk ee, tiah fiang tein a chim. Tih tlak cu a si taktak maw?

Si eee; tih tlak a si hrim ko. Facebook ah ca sau rel a har caah pakhat tein ka langhter lai mu:

Nai bik research an tuahnak in an hmuhmi cu “atu lio US ram High School siangngakchia dihlak chung in zatuak 3% nih an chuah lio i an sinak (gender) an kal taak cang” tiah a chim. A sullam US high school siangngakchia zatuak 3% hi nu in hrin a rak simi zong “pa ka si” a timi, pa in hrin a rak simi zong “nu ka si” a timi an si tinak khi a si. Cu hna lak ahcun “nu zong ka si lo, pa zong ka si lo” a timi zong tampi an i tel ve.

Atu US ram chung ahhin High School siangkngakchia minung 15.1 million an um caah zatuak 3% cu 453000 an si, tinak a si. Hi vialte nihhin Pathian nih a ser hna ning an sinak an duh lo; an i thlen. Cu hna lak ahcun nan fale nifatin sianginn an kai!

Tih a nung chinchin rihmi cu atu lio US ram chung ah ngeih-khat (same sex) aa ummi nuva khuah 594000 an um. Cu chung ahcun khuah 115000 hi fa a hring cangmi an si. Hi hna fale vialte hi US ram hmun zakip ah sianginn an kai ve lai, a cheu cu siang cachimtu le cawnpiaktu phunphun ah an chuak lai. 

Cucaah hi hnu kum tlawmpal ahcun US ram chung ngakchia hna lakah Pathian sermi nupa sinak (gender) zeihmanh ah a rel timi lomi zatuak % in an tam tuk cang lai caah society fak chinchin in influence an tuah rih lai. Kan fanu le hna caah nupi hal i kan kal a hauh lai caan hi naih ngai cang dawh a si. Ka tih lawlaw…

Nizan ah khan US ram Virginia ah a ummi sianginn pakhat nih “nu a si hrimhrim komi siangngakkchia nu kha ‘pa a si ko’” a ti duh lo ruang ah cawnpiaktu saya pakhat Pu Peter Vlaming cu a rian in an phuah.

Ram tha (US/Ausie) phanh cu kan fale ca ko ah kan duh, ti a rak si tawn nain…fale caah duh awk a si le tih awk a si zong lung a fiang kho ti lo. Na fale caah Pathian maw naa thim lai vawlei? timi biahalnak hi US ummi kan miphun hna ca ko ahhin a har khun. A si nain aw, khuazei kaa hmun kan um poh ah Bawipa a tihmi fale ngeih khawh nak laam cu a um ko dah kaw; nu le pa tu hi Pathian bia le thlacamnak in chungkhar kilven teimak deuh kan hau i si…