Church 03 : "Thazaang Aa Pe Ding Kan Si"

Hebrew 3:12-14

12. Ka u le ka nau hna, a nungmi Pathian zamtak a duhmi lungthin ṭhalo le Pathian bochan duh lonak lungthin a ngeimi nan um sual nakhnga lo i ralring u. 13. Nannih cu sualnak nih an hlen hna nakhnga lo le lungṭhawng in nan um sual nakhnga lo, Cathiang nih, “Nihin,” a timi kha nan caah nihin a si chung paoh cu, nifate in pakhat le pakhat i bawm lengmang u. 14. Zeicahtiah a hramthawk tein ralṭha ngaiin kan rak zumhmi kha fek tein a dongh tiang kan i tlaih ahcun, kan dihlak in Khrih hawi kan si dih zungzal lai.

Intro: Tukum cu refugee caah kan kum chiahru taktak a si. Kan phungthluk ah “Kei ka fapa hrin kum ah pul tlung” timi kan ngei. A sullam cu fapa hrin a harhar he, kei nih ka hun hrin cangte pul a tlung i a thi ai; ka vanchia tuk tinak khi a si. Austrlia cozah nih innkaa kaupi an hun awn i a tomtom bak in kal a hung si tikah aho poh ruahchannak tha tuk kan ngei cio. Micheu khat cu an kan auh ko lai tiah fale sianginn kai a ngoltermi le a thilri zong a zuar dihmi kan um len cang ti a si. Zeitik hmanh refugee sok ve a lung chuak bal lomi zong tampi Delhi ah an rak chuak cio hna. Cu nih a langhtermi cu tu hlan vialte nak in tukum cu refugee nih ruahchannak kan ngei deuh tinak khi a si cuh. Cu bantuk lio thengte ah UN nih kan nih Chin an kan phih thup ko tikah hin ruah ah lung a fak ngaingai! Kawlram lei kir ti ah le ralkap nak khuasaknak kong ruah ko ah lung a dong. Hi kaa um ti ah le ram dang kal hngah si tung lo i hi kaa hmun ah kum-khua um ngaingai cu kan ruat kho fawn lo. Zeidah kan tuah lai? Zeitindah kan um lai? Zeitindah khua kan sak lai? timi ruah ah bei a dong ngaingai. Hi bantuk beidonghnak caan ko ahhin zumtu kan ziaza taktak a lang theo tawn; ka beidong i ka ding, ka beidong i pumh zong ka zuam lo, ka beidong i ka thintawi etc. tiah lungretheih le beidongh kha sual kan puh hna i kan nun kan duh poh in kan hman sual tawn. Hi bantuk caan ahhin Khrihfabu kan rian i hngalh hi a biapi taktak. Bei dongh ruangah Pathian a kal takmi kan um sual nak hnga lo, zeidah kan rian a si? Zeitindah kan um lai? timi kong kan chim lai.

Big idea: “Beidonghnak ruang ah Pathian kan kal tak sual nak hnga lo khat le khat thazaang kan i pek a herh”.

I. Pathian tel loin kan nun caah beidonghnak kan tong Vs. 12-13

Kan minung sinak nihhin Pathian hi a rem lo; aa lawmh caan zong ah a rem lo i a ngaihchiat caan zong ah a rem hlei lo. Pathian he aa hlatpi in um peng khi a duh. Cu bantuk kan minung sinak lungput cu Vs. 12-13 ahhin phumli in a fianter:
1. Pathian zamtak a duhmi lungthin ṭhalo v. 12a
2. Pathian bochan duh lonak lungthin v. 12b
3. Sualnak nih an hlenmi lungthin v.13a
4. Lungkhawng in a ummi lungthin v. 13b


II. Kan bei a dongh nak hnga lo khat le khat thazaang kan i pe Vs. 12c,13c

Hi kaa ah beidongh a timi hi Pathian zaam tak a chim duhmi a si. Fek tein Pahhian i tlaih zuam ti lo, taksaduhnak lam zulh tak diam khi a chim duhmi a si. Cu bantuk in zumtu nih Pathian kan zam tak sual nak hnga lo nawlpeknak voihnih kan hmuh:
1. I ralring u V.12c
2. Khat le khat i bawm u V.13c

III. Harnak ruang ah Pahhian kan zam tak lomi nih Khrih zumtu taktak kan si a langhter V. 14

Micheu nih mah Bible cang hmang hin “khamhnak co hnu ah a sual thanmi cu Hell an tla lai” tiah an ti. Hi Bible cang te hi felfai tein zoh lo ahcun a chim duhnak nganh piak sual a fawi te. Holh dang Bible (version) dang ahcun “kan rak zumhmi kha fek tein a dongh tiang kan i tlaih ahcun, Khrih hawi kan rak si taktak tinak a si lai” ti khi a si. Harsatnak le beidonghnak kan tuar khawh ruang ah Khrih hawi kan si si loin Khrih hawi taktak kan si ruang tu ah beidonghnak nih a kan tei lo tinak tu khi a si. Pathian tel loin harnak ton ahcun beidonghnak a chuak, Pathian he harnak ton ahcun ruahchannak hlun a tlau i ruahchannak thar a chuak!

Application:


Rawl ei hmanh mah lawng ei a har kan ti va si kaw, minung kan caah mah lawng harnak le lungretheihnak tuar hi a har taktak. Cuca ahcun chungkhar pakhat kan lungretheihnak kha kan chungkhar nganpi a simi khrihfabu chungkhar dang he kan i hrawm/bawmh ahcun a tuar a fawi deuh! Khrihfabu cheu khat ahcun mentor timi khi an ngei hna. Lungretheihnak ton caan ah ruahnak hal dingmi, chimh ding le bawmtu tinak khi a si. John Piper nih beidongh tuk ruang ah mah le mah thah aa timmi kong a chim: Tom Steller he naa thah hlan ah na kan call lai kaan ti a ti.