Monday 27 August 2018

Church 02: "Khrihfabu le A Mission Rian"

Tex: Col. 4:2-6
(2. Thlacam ah ṭang u law, lawmhnak in Pathian sinah thla nan cam tikah lungfim tein um u. 3. Cun Pathian nih a bia chimnak caan, Khrih biathli phuannak caan cu a kan pek nakhnga kannih ca zongah thla rak cam lengmang ve u. Atu thong i ka tlaknak chan hi cucu pei a si cu. 4. Fiang tein ka chim awk a si bantukin ka chim khawh nakhnga thla rak ka campiak u.

5. A zummi a si lomi hna cung i rian nan ṭuan tikah fimnak in ṭuan u law caan ṭha nan hmuhmi paoh kha ṭha tein hman i zuam u. 6. Nan biachim nan holhrel cu a zungzal in ngaih a nuammi le a ṭhami a si awk a si i ahopaoh kha zeitindah ka chawnh ah a ṭhat bik lai ti hngalh kha nan i zuam lai.)

Intro: Khrihfabu nih a tuah dingmi rian vialte lakah zeidah a biapi bik? Micheu nih mission an ti. Mission kan tuan hlan ah kan tuah hmaisa a herhmi thil pakhat a umm; cucu Khrihfabu kanmah lak ah Khrih muisam langhter hmisa hi a si. Phun dang in chim ahcun kanmah nih kan nun in Pathian biak hmaisa khi a si. John Piper nih cun "kan minung hawi lakah nun in Pathian biaknak a um lo ruang ah mission rian a um" (mission exits because worship does not) tiah a ti. 

Cucu kan hnu zarh ah kan chim cangmi "Khrihfabu cu vawlei ah Khrih nun pehzulh in a langhtertu kan si" timi kha a si. Kanmah ah nun in Pathian biaknak a um rih lo ahcun automatic mission field ah kan cang colh; mission tuantu kan si kho ti lo. Cucaah  Khrihfabu caah a biapi bikmi rian cu keimah ka pumpak ah nun in Pathian biaknak a um cang maw, ka nun ah Khrih muisam a lang maw? tihi a si. Cu a hun changtu ahcun "mission" cu a si. Cucu nihin ah kan chim lai.

Big Idea: “Khrihfabu nih mission rian kan tuan khawh nak hnga thla kan cam i, caan tha kan hmuhmi poh mission rian tuannak ah kan hman thiam a herh”.
Illustration: Africa ram ah missionary a tuanmi pakhat pa kha mi zei maw nih “na rian na duh ko maw?” tiah an hal. “ka rian hi ka duh nan zum maw?” Hmun thur le vawlei phut a rem lo taktakmi ka si; hi hmun hi cu pawl cun a khat. Ka duh nan ruat maw? Kan dirhmanh in kan luh khawh lonak, bawh in luh a haumi thlam chung hi ka duh nan zum maw? Duh le duh lo a si lo, Jesuh Khrih  nih “kal u law miphun vialte kha ka zultu ah va ser hna u” nawl a kan pek ruang ah a si. Jesuh Khrih caah kan duhmi zong tuah loin kan duh lomi zong kan tuah ve awk a si hnga lo maw” tiah a leh hna.
Mission rian hi a zuammi nih tuan ding a si lo, a duhmi lawng nih tuan ding a si fawn lo; Khrih nawl pek a si! Nawlpek cu kan zulh lo ahcun nawl buar kan si ko. Cucaah zeitindah kan tuah lai?

I. Mission rian kan tuan khawh nak hnga thla kan cam. Vs. 2-4
1. Zeitindah kan cam lai?
* V. 2 “thlacam ah tang u” (devote ‘Gk. Proskarterevw’ in prayer): a sullam cu zeidang thil tuaktan pah le ruah pah loin Pathian sin ah 100% in lungthin ruahnak phum dih buin thlacam ding tinak khi a si. “Rian dang tuan bak loin thlacam ding” tinak a si lo; “cu bantuk thlacam caan cu i ser ding” tinak tu khi a si deuh. 1 Thes. 5:17 ah “ a zungzal in thlacam u” a timi khi innkhaan chung ah chuah bak loin cam peng tinak a si lo. “Thlacam rian kha ngol loin tuah peng u” tinak khi a si. Na paw ma i tamter lai cih, rawl rak ei peng mu, an kan ti tikah thawh loin rawl pakaan i tlaih i ei peng ding tinak a si maw? Si hlah! Rawl ei kha kan rian biapi pakhat ah chiah ding, rawl ei rian kha ngol lo ding tinak khi a si cuh. Thlacam zong cu bantuk cu a si ve; kan rian biapi ah chiah i nifate ngol loin cam caan pek zungzal a herh. Nifate, nihin thla ka cam cang maw? tihi kan biahalnak a si awk a si. Kan cam tikah khua dangdang ruah pah siloin lungthin dihlak te pek in kan cam awk a si lai. Khua zoh pah, le hmanthlak cun a si lai lo.
2. Zeica ah dah kan cam lai?
*V. 3 “kan caah thawngtha innkaa aa awn khawh nak hnga” kan cam lai. Mirang nihcun “door” timi biafang bak a hman. Biathlam 3:20 “Innkaa hram ah ka dir i ka kingh, ahohmanh ka aw a thei i innkaa a ka awngtu cu an sin ah ka lut lai.." tiah kan hmuh. Innkaa rengreng cu kingtu um lo ahcun hun phung a si lo. A sullam cu kan caah thawngtha phuannak innkaa aa hun ve khawh nak hnga, thawngtha phuan duhnak lungthin kan ngaih hmaisa a herh. Biakinn ah chim na duh ahcun kan secrectary nih pei a thanh peng ko kha, caan hal khawh peng a si. Nain Lamkaltu le zumtu hmaisa hna nih thawngtha an karhterning cu pulpit cung in a si lo; biaruahnak in a si deuh (Lamkaltu 8:4). Na umnak kip ah Khrih thawngtha phuan duhnak lungthin na ngaih ahcun caan rem na hmuh peng ko lai. Kan caah thawngtha phuannak innkaa, caan tha hun a si khawh nak hnga kan nih cu chimduhnak lungthin tu hal kan hau. A chimnak caan tha le hmunhma kan hmuh hnu ah zei ca ah dah kan cam than lai?
V.4 “midang nih an herhmi Pathian bia fiang tein kan chim khawh nak hnga” kan cam lai. Bible zong rel pah zinpan ve lo ahcun midang nih an herhmi Pathian fiang tein chim khawh cu a fawi lai lo khah. Beidong mi sin ah Pathian bia phuanak caan tha kan hmuh caan ah a herhmi te fiang tein kan chimh khawh nak hnga Bible zong kan hngalh ve a hau. Kan hawipa bang, ka cauk kaa ken lo cu poi taktak ti pawl khan cun pathian sunparnak langhter cu fawi lo. Kanmah leikap kan lungthin aa ready i Khrih tehte tha si duhnak lungthin kan ngaih ahcun Paletwa le Kanpalet ah kal dih kan hau lo, kan kiangkap ah mission rian tuan ding a tam tuk.
Ilustration: President Bush chan lio ah US nih Saddam Hussein ralkap pawl kha Miidle East ah fak taktak in an rak tuk hna. Cu tuknak cu ‘Desert Storm Operation’ tiah auh a si. Cu raltuknak hmun in a rak tlungmi US ralkap pakhat le catial thiam minthang Patsy Clairmont kha vanlawng cung ah an rak i tong. Patsy nih “zei can dah cu raltuknak hmun ahcun na um?” tiah a hal. “Kum khat le cheu” tiah a leh. “kha tluk tih a nungmi le a harmi raltuknak hmun i na um chung kha inn tlun lawngte na lung chuak peng ko lai mu” tiah a hun hal than. “Ah, ruat hlah..kan nih cu atu kan umnak hmun ah a herhmi poh tuah i kan um lo nak hmun kong ruah lo kha cawn piak kan si” tiah a leh.

II. Caan tha kan hmuhmi poh mission riantuan nak ah kan hman. Vs. 5-6
Vs. 5-6:- zeitik caan poh hi kan caah Khrih thawngtha karhter nak caan a si khawh nak hnga, hi kaa ahhin Bible nih ralrinnak a kan pek. “Kan biachim kan hrolhrel ah kan fimkhur taktak a hau”. Minung nih duhning le duhphun kan ngei cio. Kanmah duhphun tein tuah khawh peng ahcun ahohmanh hi thintawi mi kan um lo; mi tha lo zong kan um lo cuh. Kan duhnak kan i hngalh piak hna lo ruang ah maw, hngalh ko bu in kan tuah hram ruang ah dik thinhunnak le i siknak a chuak tawn. Kan kiangkap minung vialte hi a pehtlaih kan thiam hna ahcun Khrih lei ah, biakinn lei ah kan hruai ding lawngte an si. Cucaah kan rian a ngan tuk! Cu vialte cu kan nih kan mission rian an si. Midang pumh sawm le Pathian bia hna va ruah cu ka duh phun si lo, na ti khawh men. Na duh ruang ah siloin Khrih nih an fial ruang ah na tuah ve a hau. Kei cu pumh loin inn ah um ka duh, hawile vah, zuu din le i nuamh ka duh na ti khawh men. Na duhmi kha Khrih ruang ah tuah loin na um ve lai lo maw? Nangmah nih na rian na lim ahcun mitam deuh nun ah Pathian biak le thangthat a si lai. Tuzing hna ahhin kan mission rian lim cio hna u sihlaw hi nak hin kan tam deuh hrimhrim hnga. Kan mission rian a tuannak zawn i fiang hna u sih. Nihin hi Mission rian cu tuan lio ahcun a har nain a phichuak a thlum tuk. Khrihfabu nih ICBM he pehtlaihnak ser in hua leng ah mission rian kan tuanmi caah siseh, hi kaa hmun ah local mission rian a tuanmi LCC member kan dihlak caah siseh thlacam Ni a si. Thlacamnak nih a dirkamh lomi mission rian cu theipar a ngei kho lo.
Illustration: Willaim Carey nihcun mission riantuan cu sui khawr cawh he a tah chunh. Mission riantuantu cu vawlei khawr thukpi chung ah sui va lak ding in a ttummi bantuk kan si. Cu pa nih sui a lak khawh nak hnga lenglei in Hri a rak tlaih piaktu hna cu thlacamtu an si a ti. Cucaah A.D 1792 kum i India ram ah missionary riantuan ding in a rak rat lai te ah khan. Aa bochan bikmi a Pathian riantuan hawi Andrew Fuller, John Ryland le pastor dang tlawmpal innkhaan pakhat chung ah aa luhpi hna i “kei cu Bawipa nih a kan fial bantuk in Thlarau tlau kawl ah khawr chung ah ka lut cang lai; nan nih nih thlacamnak Hri nan ka tlaih piak lai maw?” tiah rak hal hna. Anmah lak in Pastor Andrew nih “Pathian hmai le nangmah hmai ah bia kan i kam, kan nun poh ahcun na caah kan tlaihmi thlacamnak Hri kan thlah lai lo” tiah a leh. Nihin India ram Khrihfa vialte hi cu biakamnak theipar cu an si.
Bawipa nih a kan fialmi mission rian tuan hna u sih!

No comments:

Post a Comment