Daniel Cauk Hrilhfiah: Dal 1 Nak

Cauk Hnulei Tuanbia

Daniel cauk chung ahhin prophet Daniel nih hmailei caan i a cang te dingmi thil kong, langhnak in a hmuh i a phuanmi hna hi fiang deuh in hngal kho cio u sih, tiah siaherhnak nganpi he  keimah nih ka hngalh khawh tawk, Sianginn i kan cawn ning in siseh, Bible lei thiamsang pawl i an ttialmi cauk pawl ka relmi chungin  siseh, fianter kaa zuam lai.

Dalkhat hnu Dalkhat in ttial khawh le hrilhfiah khawh kaa zuam lai caah ttha tein rak rel cio u, tiah kan sawm hna. 

Daniel cauk chung ah Daniel nih langhnak a hmuhmi pawl hi sullam tampi an ngei kho, sihmanhsehlaw a hmasa bik ah i fiang hna u sih, ti ka duhmi cu hi cauk chung i kan hmuhmi langhnak le biaphuan nihhin zei biaknak le Khrihfabu hmanh a chia lei in a kan hnorsawn lo ti hi a si.  A biana ah Dal 9 nak chung i "Zarh 70" (Seventy Weeks) hna khi cu kan nih Gentile mi he pehtleihnak zei hmanh a ngei lo, Israel mi hna ca lawng bak ah a hmuhmi le a phuanmi a si.

Daniel cauk hi micheu nihcun Thuhmi biathli (Cryptic) cauk ti zongin an auhmi si i Biathlam cauk khi Daniel cauk he aa pehmi  a si l, tiah titu zong  an um ve. Aa peh pahmi zong a lo ngai  tak tak k nain a peh taktakmi si loin pehtleihnak a rak ngeimi tu an si deuh. Cun kan Bible uk 66 hi pakhat le pakhat pehtlaihnak a ngei dihmi (Interdependent) lawngte an rak si i an dihlak in an chim ciomi a muru cu kan Bawipa Jesuh Khrih kong lawngte an si cio. 

Daniel Dalkhatnak chung ahhin a bik in kan hmuhmi cu, Babylon Siangpahrang Nebukhadnezzar nih Daniel le a hawi le pathum sal i aa kal pi hna nak kong le Siangpahrang in chung i rian ttuantu ding in thim an sinak kong, Siangpahrang ti-rawl in anmah le anmah i thurhnawmht an duhlonak kong le Pathian hmai i zumhawktlak tein an nunnak kong deuh hi a langhter mi a si.

Solomon Siangpahrang a thih hnu ah Israel Pennak cu chaklei pennak le Thlanglei pen nak tiah tthen hnih ah a rak I tthen ,Thlanglei pennak cu Israel tiah an rak auh i Israel miphun phun 10 i fonh in an rak derh, an khualipi cu Samaria a rak si. Cun Chaklei pennak cu Judah tiah an rak auh ve ii Israel miphun chung in Judah le Benjamin nih an rak derh ve i an khualipi cu Jerusalem a rak si. Cu ti cun Pennak pahnih in cun an ron i uk i Bible chungah tam deuh in kan hmuh kho mi cu Chaklei pennak kong deuh hi a si. 

Thlanglei Isreal pennak cu B.C 722 ah Assyrian Siangpahrang nih a rak lak i Chaklei Judah pennak zong cu Babylon Siangpahrang Nebuchadnezzar nih B.C 586 ah a dih lak in a rak lak ve. Babylon Siangpahrang Nebuchadenezzar nihhin Chaklei Judah pennak hi voikhat ah a dihlak tein la loin, Voithum lak in a rak lak. Cucu mirang in, three Deportation tiah auh a si. A voikhatnak cu B.C 606 Siangpahrang Jehoiakim chan lio ah, a voihnihnak cu B.C 589 Siangpahrang Jehoiachin chan lio ah, a voithumnak cu B.C 568 Siangpahrang Zedekiah chan lio ah, tiin voithum tiang lak an rak an si.

Daniel le a hawile an kal pi hna lio hi a voikhatnak lio ah a rak si i a voithumnak ahhin Jerusalem Biakinn zong an rak hrawh leng ah, Biakinn chung thilri hna zong an rak lak dih (a voikhatnak ah tlawmpal cu an rak lak cang). Hi thil vialte hi Pathian nih Prophet Jeremiah sin i a rak phuan chungmi a tlinnak lawngte an rak si dih (Jeremiah 25:11-12).

Note: Hihi David Ni Cung Lian nih LCC viber group ah a voikhatnak a postmi chung in kan lak i LBMI Lai Catialning he aa tlak deuh in spelling edit kan tuah hnu ah, kan postmi a si. A dang a ttial ciami zong a dot dot tete in zapi rel awk ah hun post khawh kan i zuam te lai.