"Hallelujah" Tihi Thlarau Holh A Si Hlei Maw?

Biadomhnak

Thawngtha chimtu cheukhat nih "Hallelujah" ti cu van holh a si, khuachia nih an tih, teinak petu a si, tiah a phunphun in an chim tawn na theih bal ve theo lai. Micheu khat nihcun, "Hallelujah" ti cu Thlarau thilthup ah kan ruah i a tih in kan tih ve. Cu nak in khua ruah har chinchin a si rihmi cu, "Hallelujah" tihi kal sual ah a ruatmi zong kan um rihmi hi a si. Asi ahcun, "Hallelujah" ti cu zeiset dah a si i, zei bantuk sullam dah a ngeih? timi tawi te in hun zoh tuah hna u sih.

A. "Hallelujah" Timi Biafang A Chuahning

"Hallelujah" timi hi Hebrew biafang pahnih "hallelu" le "Yah" timi fonh in a ra mi a si. "Hallelu" ti cu "hallal" ti in a ra mi a si i a sullam cu "thangthat" tinak a si. Hi ka ahhin nawlpeknak (imperative) in hman a si caah, "thangthat tuah u" tinak khi a si. Cun a pahnihnak biafang "Yah" timi hi cu "YHWH" ti in a ra i "Pathian min" a si. Baibal chung ah Pathian min tampi a um. Cu lak ah, "YHWH" timi hi Judah mipi nih Pathian an auhnak min le an tihzah bikmi min a si.

Hi biafang pahnih fonh i a sullam cu "Bawipa cu thangthat tuah u", tinak a si. Sihmanhsehlaw "Hallelujah" timi hi ningcang lo deuh in kawmhmi Hebrew biafang (Hebrew Idiom) a si caah, lakhruak in Bawipa thangthat tuah u, hun timi nih a sullam dihlak a tlinh khawh deuh lomite a um.'Lunglawm te in thangthat, asilo ah, Pathian ah i pawrhlawt', tinak khi a si. Hebrew scholar cheu khat chimning le bang ahcun, 'Hallel=thangthat' timi biafang hi "hrut ngai le molh ngai in thil a tuahtu hna pawl chimnak zong ah hman a si", tiah an ti.  

B. Baibal Chung Ah "hallelujah" a langhning

Hebrew Baibal Chung Ah, "hallelujah" tihi 24 a lang. Psalms 111-117, 145-150 karlak ah khin voi 24 kan hmuh. Cun Greek holh in tialmi Baibal, Biathlam 19 ah khin voi 4 kan hmuh ve. Psalms chung i a hmanning zoh tik ah, Psalm catialtu nih hi biafang hi mizapi kha hma khatte ah Pathian thangthat ding in fawrhnak caah a hman deuh. Psalms 113-150 karlak hi "Hallel Psalms" tiah auh a si. A sullam cu thangthatnak hla, tinak khi a si ko. Hi thangthatnak hla an sak caan ah hin, an hla sin ah, Israel mipi nih "hallelujah" tihi an rak sak chih tawn mi a si. 

C. Chanthar Zumtu Pawl Nih "Hallelujah" Kan Hmaning

Protestant Khrihfabu tampi ahcun, "Hallelujah" ti le "Bawipa cu thangthat si ko seh", tihi aa tluk te in an cohlan veve hna. An pahnih in, Pathian thangthatnak le Pathian sin i lunglawmhnak langhternak caah aa tluk te in hmual an ngeihter hna. "Hallelujah" va ti theng nih zei sullam thuk hlei le thlarau thil deuh hlei a chuahpi in an hmu lo. Zapi hmai in, mizapi hruaitu nih "kha...'Hallelujah' kan ti hna lai" tiah ti len hau lo in mi pakhat nih, a duhmi le a hngah pengmi thil a hmuh tik ah, aa lawmh tuknak Pathian sin ah a langhternak a si awk a si ko, tiah an ti.

Sihmanhsehlaw protestant khrihfabu pawl chung in denomination cheu khat le zumtu cheu khat nihcun, "Hallelujah" na ti ahcun na dam lai, "Hallelujah" na ti ahcun khuachia nih an zam tak lai, "Hallelujah" ti cu van holh a si etc. tiah a phunphun in an chim lawng siloin cu bantuk cun an hman taktak fawn. "Hallelujah" au ruang i khuachia an zam le zam lotu cu, an mah khuachia le thiang thlarau lawng nih an hngalh khawh mi a si.  

Asi ahcun, "Hallelujah" cu kan hmang lai maw, hmang hlah? Baibal nih nawl a kan pek mi a si caah, lunglawm tein kan hman awk a si ko. Baibal chung i hman a rak sining zoh tik ah, a caan ahcun hla hruaitu nih, "Hallelujah" ti hna u sih" a ti hnu ah mizapi nih an hun chim ve caan zong um dawh in a lang.. Cucaah, a hmun le caan a rem ko ahcun, pumpak in a si zong ah, a bu in a si zong ah, "Hallelujah" ti hman hi zumtu nih thlirit ah kan chiah awk a si hrimhrim lo. Sihmanhsehlaw "Hallelujah" timi ahhin thlarau thawnnak power a um, hei ti phun in tanbo hman in hman awk tu cu a si hrimhrim lo. 

Zumtu nun in Thiang Thlrau thawnnak a chuahter tawntu cu biafang (eg. Hallelujah) men si lo in, thlacamnak le a nawl zulhnak in punghman te i kan nun Pathian sin kan peknak tu hi a si deuh. 

Pathian sunparnak ca a si ko ahcun, "Hallelujah" cu kan mah diriamhnak cio te in hman awk a si ko. Kan hman tik ah, a cunglei kan langhter cangmi a sullam belte philh lo a bia pi. Cun, kan mah bantuk in a hmang kho ve lo mi hna zong nih "hallelujah" timi biafang theng hman lo zong in, keimah tluk te in Pathian an thangthat khawh ve ko, zong philh lo ah a tha.