Kei Nihcun Mah Nupi Mah Pasal Te Ingeih Hi, A Herh Ka Ti:

Biadomhnak:

Kan Baibal nih tthitumnak nih aa tinhmi hi tampi a langhter caah pakhat hnu pakhat in fianter ning, tiah cun cauk lawlaw in tial, a hau hnga. Kanmah chan mino hna nih hin kan ruahcio awk a si, tiah ka ruahmi le Baibal zong nih ruahnakcheuh (advice) bantuk in a kan pekmi a si rua, tiah ka hmuhmi tawi tein ka hun tial lai. Baibal nih ngei u, tiah a kan fialmi si hlah hmanh sehlaw kan minung sinak ruang le kan chan thilum-kalning ruangah, mah nupi mah pasal te ngeih hi a tha cem ko rua, tiah ka ruahnak a ruang pahnih tein ka langhter lai.

A.Minung Cu Sexual Being Kan Si Caah Mah Nupi Mah Pasal Te, Ingeih Ah A Tha.

Vawlei cung saram dang vialte hi kan zoh hna tikah phol caan te an ngei i, an phol caan te lawngah pa an hlam. Saram pa pawl zong nih an nu pawl an phol lo ahcun, dai tein an zoh ko hna. Sihmanhsehlaw kan nih minung cu nu zong nih phol caan le phol lo caan dang loin pa kan duh i, pa zong nih an phol caan, phol lo caan ti loin, kan duh peng ko hna. Hihi Pathian nih a kan sersiam ningte a si. Hi bantukin a kan sernak ah hin, Pathian nih tinhmi a ngei i cucu, saram bantuk in phol caan lawngah iduhzulh i, phol a ziam in aa kal tak men mi siloin, nun chung dihlak hmunkhat teah a umti kho mi le aa duhdaw kho pengmi kan si khawhnak hnga, hi bantuk in a kan ser hi a si. Hihi kan minung sinak paiper chungah aa khumhchihmi a si. Cucu, kan Laiholh in, dawh tein, ka hung auh thiam deuh lo caah mirang holh kaa hlan i “Sexual Being” ka hun timi sullam cu a si. Sexual Being kan sinak nih a chuahpi mi duhnak cu nuduh/paduhnak (sexual desire), tiah auh a si. Cu duhnak (sexual desire) cu Pathian pekmi a si caah thil tha a si.

Sihmanhsehlaw cu duhnak (sexual desire) cu tthitumnak paiper chung lawngah hman ding, tiah Bawipa nih nawl a chuah ai! Cucaah tthitumnak paiper leng i tuah duhnak ngeihmi cu a thurmi duhnak (lust), tiah ti a si. Lust cu thil tha lo, a si cang! Zeicatiah thil tha kha a hman lonak zawn ah hman a timtu duhnak thur a si. Hi kan duhnak hi vawlei cung thil nung vialte lakah a thawng bikmi a si. A thawng taktak! Kan pum dang dang, kan thluak, kan kut kan ke etc. vialte nak in a thawn deuh caah, a hohmanh nih chuak loin an tlai kho cio lo. Cucu hau leng lo kan eiter sual lengmang nak a ruang a si.

Baibal  nih hi duhnak a hmunhma lo ah cawl loin, a tlai khotu cu Thiang Thlarau lawnglawng a si, tiah a ti (Gal. 5:16). Sihmanhsehlaw hi duhnak teikhawh peng nak ahcun Thlarau khah nun (Spirit filled life) ngeih peng a hau ve. Thlarau khah nun ngeih peng cu a har tukmi a si caah mino lawng lo, Pastor le evangelist tampi zong nih Hau Leng Lo Rawl kan dah sual tawn theu! Tthitumnak paiper lengah nupasinak (sex) hman cu, kan nih Lai mi nihcun, “nupa sualnak” tiah kan auh thopmi a si. Cucaah sual a si maw si lo, tihi mi dang nih rak chimh hau loin kan nupi asilomi nu kan ihpi lio caan le kan pasal asilomi pa nih a kan ihpi lio caan i sual a kan phawttu kan mah lungthin lila a langhter ko! Sual hmanh ah sual ngan taktak a si.   

Cucaah hi duhnak hi zeitindah kan tei khawh lai, tihi kan ruah a hau mi cu si. Tei pengnak taktak cu ka hngal ve lo nain hi duhnak fakpi in a hung chuah caan poah ah, caan hman pitu nangmah nupite, nangmah pasal te na ngeih ahcun 90% hrawng cu teikhawhnak lam na ngei. Zumhnak in kan der caan ah hi duhnak hi, a thawng khun in, Satan nih a hman tawnmi a si caah nupi a thader caan ah pasal nih, pasal a thader caan ah nupi nih, tiin thlarau tha ipek khawh a si caah nupi/pasal ngeimi hna caah teitu sikhawhnak lam, a kau deuh ngaingai. Paul zong nih, “Sihmanhsehlaw nan duhnak cu nan i sum khawh lo ahcun vaa tthi vaa um ko u, duhnak in a kangh in kanghnak in tthitum cu a tha deuh,”(I Korin 7:9, tiah a kan ti. Cucaah nu duhnak le pa duhnak (sexual desire) nih sualnak ah a kan thluk sualnak hnga lo tthitumnak hi bawmchantu pakhat ah Paul zong nih a hmuh ve ko hih! Cucaah hi bantuk duhnak nih hna a hnawh cuahmahmi na si ahcun nangmah nupite/nangmah pasal te naa ngeih ve ah a tha, tiah ka hmuh.  

B. Kan Chan Thilum-kalning Ruangah Mah Nupi/Mah Pasal Te, Ingeih Ah A Tha.

Atu kan chan hi universal level ahcun Informnation and Tecnology (IT) chan, tiah auh a sinain international Chin level ahcun “Elzimno Langh Chan”, tiah auhmi a si. Zeiruangah dah chantiluan a tlaithiamtu kan pa Kio Hmung nih elzimno langh chan ah kan nung cang a ti, tiah cun kan pale hna chan tiangah khan nungak tanpawr cu vun chim hlah, nutung tanpawr hmanh hmuhkhawh a rak si lo. Zeimaw caan ah, aa kholh liomi nungak tanpawr va hmuh sual hmanh khi, a rak sunglawi ngaingai. An phei le an paw hrawng hna hi cu an pasal le taktak hmanh zoh an rak sianh hna lo. Thil sunglawi tuk kengtu kan si, ti an rak hngalh caah a zual in an rak i zual. Hei tuak ve ko law, kha bantuk chan ah a rak um cangmi minung hna caah cun atu kan chan nu pawl umtuning hi cu a rapthlak tuk cuh!

Pakhatnak ah kan chim cangmi, minung nih kan ngeihmi sexual desire hi, kan mit he an ipehtlaihning a tha taktak. Mit he hin, “nang nih zoh law, kei nih ka rak tawlrel lai,” tiah biakamnak tuah hna sehlaw cu ko cu a lo. Mit nih a zohmi ningin hi duhnak hi a cawl cang ve. Cucaah Elzimno lang nu pawl tam tuk, hmuh awk le zohawk an um caah mit nih zeihngalh loin a zoh tawn hna caah pa pawl pum chungah, cu duhnak te cu, um sawhsawh thiam loin a cawl tawn. Cucu buai hram aa thoknak cu a si! Elzimno pawl kan dawi piak i a duhnak kan tuahpiak ah le Bawipa hmaiah sual nganpi si fawn tung, dai tein umter diam ko ning, tiah le a har ngaingai fawn. Cucaah kan mit nih a hmuhmi ruangah a chuakmi hi buainak hi, zeitindah kan daihter lai, tihi ruah cio a haumi si. A daihter thai nak ngaingai hi cu ka hngal ve lo nain  Baibal nih ruahnak a kan cheuhmi pakhat cu ka hngalh.

I Korin 7:2 “Sihmanhsehlaw sualpalhnak a tam tuk hringhren caah hin, pa nih a mah nupite I ngeih sehlaw nu nih a mah vate i ngeih seh”, tiah Paul nih a chimmi kan hmuh. Hlan lio Korin khua kha an sual kan ti nain nihin, kan vawlei sualnak he tanhchunh cun, chimtlak an si lo. Hi cacang hi, kiangkap ah nupa sualnak tuahkhawhnak lam tam tuk (nu hor, elzimno lang nu pawl) a ngeimi, Korin khua zumtu hna sinah ah a rak chimmi bia a si. Cucaah atu kanmah chan zongah hin, nupa sualnak nih sal ah a kan tlaih i, miphun le ram caah thathnemnak ngei kho loin minchiatnak nih a khuhmi kan si sualnak hnga lo, hi bantuk duhnak nih hna a hnawhmi kan si ahcun, kan mah nupi kan mah pasal cio te kan ngeih ah a tha ko, tiah kei nihcun ka hmuh.

Tthitumnak biakam lengah tuahmi nupa sualnak tuah cu mipi sin in upatnak le hmaizahnak a kan firpiaktu a si.

  Pathian hmaiah sual phuhrunnak a kan phorhtu a si.

 tthennak chuah pitu le mithli tlaktertu a si.

  kan minung hoi he ral ah a kan sertu a si.

  Pathian ral ah a kan sertu a si.

Cucaah

Hi

Kan ral hi, thih tiang doh i zuam hna u sih!

 hna u sih!