Genesis 6: “Pathian Fapa Hna Le Minung Fanu Hna” Hi Hodah An Si?

Biahmaithi:

Deutronomy 29:29 ah kan hmuh bantuk in “Biathli thup cu, Bawipa ta a si”! Pathian nih hngalh kan herhmi cu a dihlak in, Baibal ah fiang tein, a kan pek. Hmun tampi ahcun kan herh mi lawng siloin hngalh kan duhmi zong a kan hngalhter ve ko. Kan nih Lai miphun hi, biaknak kong he aa pehtlai mi poah tling te le fiang tein, hngalh dih kan timh tawn ruangah kan thlarau nun caah biapi a simi thil hmanh buaipi loin, hngalh zongah thathnemnak a ngei tuk lem lomi, thil tu buaipi kan hmang tawn. Thlarau nun ah a thahnem mi an si lo zongah Baibal chungah kan fian lomi tam tuk a um ahcun Baibal rel huan ti lonak le zumhnak in hnutawlhnak hna a si ve tawn caah, fianh khawh a si mi poah cu, fian kan i zuam ah a tha ko. Mah balte Baibal nih dengteo in a fianh lomi thil tete kong bal ahhin fimkhur deuh in kan um cio ah a tha. Alu adaw kan zoh dih hnuah, hman bik dawh in kan hmuhmi kha i lak duak zau i, dai tein thutpi khawh in zuam kan hau.

Atu tan ah ka hun tialmi Baibal bia harsa hi rak kan tialpiak ko, tiah request tuah tu tete an um caah: Genesis 6: “Pathian fapa hna le Minung fanu hna” timi hi hodah an si?, tihi a si. Hi kongah hin zumhning aa dan cio caah zumhning (view) fianternak, an felfainak (strength) le soiselnak (weakness) tete, ka hun langhter hmaisa lai i, a donghnak ah keimah nih ka zumhmi fianternak ka tuah te lai. Nang zong nang mah tein, a hman bik nan timi, rak i thim ve te ko.

I.Hi Cawnpiaknak kongah Zumhning Phun Thum:

“Pathian fapa hna le Minung fanu hna” hi hodah an si timi kongah hin zumhning tang tampi zong a um ko lai nain laktlak deuh bikah ka ruahmi phun thum in ka hung langhter lai.

A: Misual Kain Fale Le Miding Seth Fale Chim Duhnak A Si:

  

Fianternak: Hi zumhning nih aa tlaihmi hna nih Gen. 4:26 ah “Seth chan khan minung nih Bawipa kha a min in biak hram an thawk” a timi cherhchan in Seth cithlah cu Pathian ttihmi an si i, Kain cithlah cu Pathian ttih lomi, misual cikor an si, an ti. Pathian tihmi Seth tefa hna kha hika zawn i “Pathian fapa hna” timi hi an si i Pathian ttih lomi Kain tefa hna kha “Minung Fanu hna” tiah a timi hi an si, tiah an zumhning a si.

Felfainak: Genesis 2: ah Pathian nih minung a sernak kan hmuh. Pa cu tlak in a ser i, nu cu pa pum chungin a ser (vs. 7, 23). Adam le Eve i an nu/pa cu Pathian a si. Hihi thlarau lei in siloin taksa hrimhrim in an nu/pa a si. Genesis 4: ah Pathian ttih lomi Kain cithlak kong fian tein a chim i, Genesis 5: ah Pathian a tihmi Seth cithlak kong, a chim ve. Moses nih Israel mipi a cawnpiakmi hna hi “pathian tihmi le pathian tih lomi” aa danning a si: cucu Israel miphun caah a biapi tukmi a si. Cucaah Genesis 6: ah a chimmi, “Pathian fapa hna” timi cu Seth fale hna chim duhnak a si ko i, “Minung fanu hna” timi cu Kain fale kha an si ko. 

Baibal hmun dangdang tete kan zoh tik zongah minung hi “Pathian Fa”, tiah a tinak hmun tampi ah hmuh an si: Deut. 14:1, 32:5, Sam 73:15, Isaiah 43:6-7, Hosea 1:10, 11:1, Luke 3:38, 1 John 3:1-2, 10. Hi bantukin Seth tefa hna le Kain tefa hna an itthitumh ruangah hin Pathian a thinhung tuk. Zeicatiah Gen. 3:15 ah Pathian tihmi (Seth) cikor chung khan, Satan lu rialtu Messiah a chuahnak ding kong chim chung a rak si cang caah Seth tefa hna nih hi bantuk in Pathian ttih lomi hna he an icawkpolh ahcun Messiah chuahnak ding lam a rawk kho, timi kha a hmuh chung caah Pathian nih buanchukcho in cawhpolh vialte a thah hna nak a ruang zong kha a si.

Soiselnak: Hi zumhning hi a ttha ngai nain a chambaunak cu Genesis 6: nak nih a chimmi fianternak a tuah tling lo. Seth tefa hi khuazei Baibal hmanh ah “Pathian fapa=sons of God”, tiah auh an si bal lo. Hi zumhning nih hin Seth tefa le Kain tefa an idannak hi fak tuk luammam in a chim fawn. Seth tefa dihlak nih Pathian an ttih dih cikcek, ti awk a tha lo i, Kain tefa zong an dihlak in misual, Pathian ttih lomi lawng te an si dih, ti awk zong a tha hlei lo. Moses nih Genesis 5: ah fiang tein a cawnpiami cu “Adam le Eve sinah biakamnak a tuahmi (Gen. 3:15) a tlamtlin khawhnak hnga, Pathian miding umchun Noah chungkhar aa zuah”, tihi a si. Noah chungkhar lawng hi Seth tefa an si hrimhrim lai lo va si kaw, Seth tefa dihlak miding an si kan ti ahcun, zeiruangah dah Pathian nih buanchukcho in a luater dih kun hna lo, tihi biahalnak tuah khawh a si.

  

“Minung Fanu hna” timi zong hi Kain tefa lawng an si, tihi a baibal umkalning zoh tikah, a har ngai. Genesis 6:1 ah “Cu tikah cun vawlei khuazakip ah minung tampi an um cang i fanu kha an hrim hna”, tiah kan hmuh. Kha lio vawlei pumpi huap in a chimmi a si caah Kain tefa lawng rumro i chiah hi, aa dawhtlak lomi a si lo.

B. Pathian Fale Timi Cu Siangpahrang Hna Chimduhnak A Si:

  

Fianternak: Gensesis 6: ah “Pathian fapa hna” timi hi vawlei siangpahrang hna tiduhnak a si i, “Minung fanu hna” timi hi cu miung fanu tinak sawhsawh a si ko, tiah an ti. “Nephilim” timi pawl hi nawl ngeinak a hmang sual mi minung sawhsawh te an si ko, tiah an zumh.

Felfainak: Hlan lio Palestine ram hrawngah hin an siangpahrang te hi pathian he an rak pehtlaihter hna. Egypt ram hna ahcun an siangpahrang cu “Re” timi pathian fa a si, tiah an rak ruah. Biakam Hlun cauk chungah Pathian min “elohim” timi hi voitam pi nawlngeitu hna dirhmun he pehtlai in hman a si (Exo. 21:6, Sam 82:1). Cucaah “Pathian Fapa Le hna” timi hi cu zeidang siloin vawlei siangpahrang/uktu hna chim duhnak a si ko, tiah an ti.

Soiselnak: An zumhning a hmannak cu tampi an chim ve len nain, hi zumhning hi cu Baibal hrilhfiah ningcang tein hun kherhlai tikah, a tlakchamnak a tam ngaingai. Zumlotu siangpahrang hna cu pathian fapa, tiah auh an rak si taktak ko nain Israel siangpahrang zeitikhmanh ah Pathian fapa, tiah auh an si bal lo. A cunglei Baibal cacang an langhtermi hna ahhin siangpahrang le uktu hna cu “pathian hna”, tiah auh an si ve taktak ko, sihmanhsehlaw “Pathian fapa” tiah auh an si bal lo. Cun “Nephilim” pawl minung sawhsawh an si ko, an timi zong hi a Baibal cacang nih a chimmi he aa kalh ngaingai. Mi sawhsawh ve men an si ahcun zeiruangah dah Genesis 6:4 chungah mitihnung, mingan pipi in, a chim kun hnga hnga? Cucaah hi zumhning nih hin Genesis 6: nih a chimmi fianternak a pe lo, ti khawh a si.

C: Pathian Fapa Hna, Timi Cu A Sualmi Vanmi An Si:

Fianternak: Genesis 6: 2, 4 ah a chimmi “Pathian fapa hna” timi hi cu minung (pa) muisam aa lakmi, a sualmi vanmi, tiduhnak a si ko. A sualmi vanmi pawl nih Kain tefa chung in siseh, Seth tefa hna chung in siseh, nupi an thit hna i mi thawngthawng le mingan pipi Nephilim pawl an hrin hna.

Felfainak: Nephilim timi pawl hi minung le vanmi kahpia an si caah mi sawhsawh nak in pum rua hrimhrim in an ngan, an thawng deuh an min a thang, tiah an zumh mi hi Genesis 6:4 i “mi ngan pipi” timi he aa zul ngai. Vanmi hi “Pathian fa”, tiah voitam pi Baibal chungah ti, an si. “Pathian fale hna pumhnak hmun ah khan Satan zong a ra ve” (Job 1:6, 2:1), “dairel arfi hna nih hmun khat ah hla an sak tikah, Pathian fale hna cu lunglawm in an au” (Job 38:7, Sam 89:6, Daniel 3:25).

Soiselnak: “Jesuh khrih nih…vanmi bantuk an si lai an i thi in an i um ti lai lo” (Matt.22:30), tiah a ti. Cucaah Genesis 6: ah vanmi nupi an thi, timi cu a si kho lo, tiah soisel a si.

II. Keimah Nih Ka Zumhmi Fianternak:

  

A pakhatnak hi an chimmi a tha ngai ve nain a hnu hmai tha tein, kan zohpiak tikah cohlan awk a tha lo mi tete an um hna. Thachunhnak ah Seth tefa miding ah a chiah dihmi le Kain tefa misual ah an chiah dih ning, Nephilim timi mingan pipi mi sawhsawh an si ko, an timi te hna nih hin cohlan awktlak tehte ngei lo ah, a canter.

A pahnihnak hi cu Genesis 6: nih a chimmi fianter loin a mah tein a um sawhsawh mi ka lawhter. Tahchunhnak ah Egypt siangpahrang pathian fa, tiah an auhnak hna cherhchan ah la in, hika i Pathian fapa hna, timi hi vawlei siangpahrang an si, tiah an ti cuh: Baibal ca nih a chim bak lo mi. Cucaah cohlan awktlak tehte an ngei deuh loin ka hmuh.

A pathumnak hi soiselnak cu a tlawm nain, a umchun pakhat hi Jesuh chimmi bia a si ngelcel ruangah ah ruahawk a um ngai.

Hi tluk tiang ka langhter cang hnu ahcun kei zeiahdah kaa hrawm lai, ti cu biachahnak kan tuah pah cio cang rua, tiah ka ruah. Catialtu keimah nihcun pathumnak:“Pathian Fapa Hna, Timi Cu A Sualmi Vanmi An Si”, ti hi an tan a tha bik in ka hmuh caah, ka dirpi. Hi zumhning a felfai bik in ka hmuhnak a ruang le ka ttanchan fianternak tawi tein, ka hun tuah lai:

A. Baibal Hmun Dang He Ikalhnak A Ngei Lo:

Hi zumhning a zum lomi hna nih soiselnak ah an hman mi cu “Jesuh khrih nih…vanmi bantuk an si lai an i thi in an i um ti lai lo” (Matt.22:30), timi te hi a si. Mah bia hi thawhthannak a zum lomi Sadusi pawl nih, Jesuh fawih an duh caah an rak halmi bia lehnak ah Jesuh nih a rak chim mi a si. Thawngtha Cauk pali chungah pathum (Mathew, Mark le Luke) nih hi kong hi, an chim. An chim ciomi tha tein cithlatnak kan tuah tikah, hi zumhning he aa kalhnak ka hmu kho lo. Lai Baibal zohchih na duh ahcun blog orhlei kam ah ka chiah ko hih! Mirang ca in ka hun langhter:

Matthew 22:30 “For in the resurrection they neither marry, nor are given in marriage, but are as angels in heaven” (ASV).

Mark 12:25 “For when they shall rise from the dead, they neither marry, nor are given in marriage; but are as angels in heaven”(ASV).

Luke 20:35 “…but they that are accounted worthy to attain to that world, and the resurrection from the dead, neither marry, nor are given in marriage”(ASAV).

 Lai Baibal Thiang kan zoh tikah “in heaven= vancung ah” timi te hi a langhter bak lo. Hihi a biapi tuk. Zeicatiah hi bianabia ahhin Jesuh nih vancung a phan cang mi zumtu hna dirhmun le vancung ah a ummi vanmi hna dirhmun aa lawh lonak kong a chim mi a si caah “in heaven” a ti khernak hi a si. Cun a chim tikah “… vancung ummi vanmi bantuk an si (mirang ning in)” tiah a ti. Vanmi nih sex an ngeih le ngeih lo kong a chim bak lo: van cungah thitumnak a um lo nak kong a chim.

Vanmi hi Greek le Hebrew Baibal ah an langhning ahcun “masculine gender=pa chimnak” in an lang. Cucaah vancungah a ummi vanmi si hna seh, vawlei cungah Lucifer he thlak cangmi vanmi si hnaseh, nusinak/pasinak timi biadawh lo deuh hmang koning law (su/zang) an ngeih lonak kong, Baibal nih khuazei hmanh ah a chim lo. Mah balte sex hman cu duh hna sehlaw, a hmannak “NU” an um caah vancung ahcun an hmang kho lai lo…cun Pathian nawlngeihnak tang ummi an si caah hman duhnak lungthin an ngeih zong zumh a um lo. 

Hi bianabia nih a kan cawnpiakmi cu “vancungah thitumnak a um ti lai lo” ti bak hi a si ko. Vanmi nih nupi an thit khawh le khawh lo a chim bak lo! Cucaah “Pathian Fapa hna, Timi Cu A Sualmi Vanmi An Si” timi zumhning he aa kalh in ka hmu lo.

B. Fianterkhawh asilomi Baibal Bia Harsa Pahnih, Hi Nihhin A Fianter:

@. Genesis 6:4 ah “Cu caan le cu hnu zongah cun, vawlei cungah Nephilim mingan pipi kha an rak um i annih cu minung fanu hna le Pathian fapa hna tefa kha an si”, tiah kan hmuh. Cun hi Nephilim migan pipi hi chan khat hnu chan khat in an rak nung peng i Moses chan tiang ah khan an rak um rih, tiah Baibal nih fiang tein a chim. “Cuka ah cun (Nephilim in a chuakmi Anak fapa hna kha) kan hmuh hna i kan mah le kanmah cu khuabawk bantuk ceo ah khin kan i hmu  annih sin zongah cu bantuk cu kan si ko” (Number 13:33), tiah Kannan ram a va zohtu hna nih Israel mipi sinah an chimmi, fiang tein kan hmuh.

Nephilim timi pawl hi minung sawhsawh cu a si hrimhrim lo, tihi a fiang. A cunglei hman thlak hi zoh u law. A hme bik te khi vawlei cung mizaran feet 6 hrawng a si. Feet 12 in 18 karlak khi Goliah chan ah a rak um rih mi misang cem umchun  an si. Genesis 6: ah a chimmi mi ngan pipi hi feet 24 in 36 karlak a lian bik pipi hmanthlak hi an si. Cucaah zeitihmanh in misawhsawh cu an si kho lo.

Asiah cun khuazei in dah an chuah kun? timi biahalnak hi a fianternak Baibal ah a um lo. Minung sawhsawh le minung sawhsawh nih an hrin mi cu, minung sawhsawh an si awk a si ko. Cucaah thil pakhat khat cu a um hrimhrim ti cu a fiang. Hi thil fianterkhawhnak hi Baibal ah lam pakhat a um i cucu: vanmi le minung kahpia in a chuak mi an si, timi zumh hi a si. Genesis 6: “Pathian Fapa hna, Timi Cu A Sualmi Vanmi An Si” tmi zumhning nih hi Baibal bia har hi a fianter.

@. II Peter 2:4 ah “A sualmi vancungmi kha Pathian nih a zuah hna lo i hell ah a thlak ko hna, khika mui lakah thir cikcin in an hren hna i biaceihnak ni kha an hngak ko”,  tiah kan hmuh. Hi a sual mi vancungmi kong thiamthiam hi Judas nih a chim ve.

Jude 1:6 “Cun pathian nih, hi vial hi nan nawl ngaihmi a si lai, tiah a ti i cu chung i a um duh lomi vancungmi hna kong kha philh hlah u. Vawlei tang muihnak ah khin thircikcin in zungzal an hren hna i sualphawt an si lai ni, ni liangngan a phak tiang cuka ah cun Pathian nih a chiah hna lai”, tiah kan hmuh than. 

Lucifer lei ah a rak tangmi vancungmi kha an dih lak in sualphawt le vawlei ah thlak, an rak si dih. Vawlei ah  cawlcanghnak nawl Pathian nih a pek hna. Cucaah Ephesa 2:1-2, I John 5:19 kan zoh tikah “Satan cu vawlei bawi” tiah Baibal nih a timi kan hmuh. Pathian nih zalong tein, ti awk in, vawlei ah, cawlcanghnak nawl a pek ko hna. Cu Lucifer group asimi hna lak i vanmi zeimaw nih Pathian rikhiah piakmi an lonh caah hrem hmun ah, thir cikcin in hren an si, tiah a cunglei Baibal ca cang ahhin kan hmuh. 

Pathian ramri an lonh hi Lucifer le group vawlei i thlak an si hnu ah a si, ti cu a fiang. Nain hi bantuk thil a cannak hi Baibal ah pakhat hmanh hmuh a si lo caah cikcin in hren mi a “sualmi vancungmi” cu ho dah an si, zeidah an sual, timi hi fianternak lam a um hrimhrim lo. Lam umchun cu Genesis 6: Pathian Fapa hna timi, minung fanu hna tthi in vawlei cungah sualnak karhtertu le buanchukcho tiang a tlunter sualnak chuah pitu hna hi Peter le Jude nih an chim Asualmi vancungmi, cu an si, tiah zumh hi a si. Cucaah hi Baibal bia har zong hi Genesis 6: “Pathian Fapa hna, Timi Cu A Sualmi Vanmi An Si” timi zumhning lawng nih a fianter khawh ve.

C. Genesis 6: Context He Aa Thlak Bik:

Genesis 3:15 “…Na tefa le nu tefa karlakah ralnak ka chih lai, nu cithlah (her seed) nih na lu an rial lai…(ASV)”, tiah kan hmuh. Baibal thiamsang pawl nih hihi khamhnak thawngtha a voikhatnak a chimtu Baibal cang a si, tiah an ti. Nu ci in a chuak dingmi Jesuh nih Satan a tei te lainak kong, chim chung nak a si.

Hi thawngtha phuan a si dih sin in, Satan nih nu tefa chungin a lurialtu ding a chuah khawhnak hnga lo, a lamkip in, raltuknak a thok colh ve. Hi raltuknak hi “the greatest war” tiah timi a si. Ralpi I/II nak zong in a ngan deuh zeicatiah cu ral cu van le vawlei karlak ralpi a si.

Genesis 4: ah Satan nih cu ralpi cu a thok colh: Pathian tihmi Abel kha a thah colh. Sihmanhsehlaw Pathian nih a mah tihmi a dang Seth a chuahter than (Gen. 4:25). Cucaah Pathian tihmi Seth tefa chung in a lurialtu a chuah khawhnak hnga lo, Satan nih a hnuzultu vanmi pawl pawl cu, minung fanu hna he a umhter hna i Pathian ttihmi miphun vialte kha Pathian tih lomi ah ser dih aa zuam (Genesis 6).   

“Satan lurialtu cu nu chungin a chuak lai, timi biakamnak cu kha chan NU dihlak nih an rak hngalh dih bantuk in, Satan lurialtu pa hringtu si ding cu an rak duh cio. Cucaah boban ttha le mingan pipi hna nupi si kha Nu vialte nih an rak duh dih caah, Pathian tihmi chungkhar hram kha a rak tlau dengmang,” tiah Baibal hrihfiah tialtu Robert Deffinbaugh nih a ti.

Pathian le Satan karlak tuknak ralpi cu a parpahlik/zik a rak phanh caah Pathian nih, a ngaih zong aa ngaichih phahmi, buanchukcho hmangin vawlei a rak tawl i a mah ttihtu, Noah chungkhar pakhat lawng a tanh hna, tihi Baibal kalning zohnak in kan hmuh khawh mi a si.

Hi bantuk context in a hung chuakmi a si caah, kei nihcun “Pathian Fapa hna, Timi Cu A Sualmi Vanmi An Si”, hi dirkamhtu tehte tambik ngei le zulhawk ah aa tlak bik in ka hmuh caah ka dir pi. Nangmah tein na dirpi dingmi cu rak i thim ve ko!!!