Nihin hi Jesuh Khrih thih Ni a si. Khrihfa hna nih hi Ni hi a "Tthami Ningan Ni" (good friday) tiah kan auh.
Matthai 27 kan rel tik ah, Ninga Ni ah Jesuh Khrih nih a tonmi thil pawl hmuh khawh an si. Ningzahnak, harnak le vailamcung thihnak tiang in a tuar Ni a si!
A celh lo tuk ah "Ka Pathian, ziah na ka hlawt?" (Matt.27:46) ti tiang in a rak ttap khah!
Ziah, cu tluk fah-fak tuar Ni cu "a tthami"... "Good Friday" tiah kan auh khawh? Cu Ni cu aho ca tal ah a ttha maw?
Micheu nih Jesuh vailam cung thihnak cu misual caah a tthat caah "Good Friday" tiah auh a si, an ti. A thihnak phichuak cu misual caah tthatnak phortu si hmanhsehlaw a thihnak a thihnak kha cu misual caah "a tthami" a si hrimhrim lo!
Jesuh thihnak hi Pathian ca zong ah a ttha lo, misual ca zong ah a ttha lo i amah Jesuh ca zong ah a tthami a si hrimhrim lo!
Pathian caah a ttha lo: zeica tiah a fapa ngaihchun thih Ni a si!
Misual caah a ttha lo: zeica tiah kan sual biaceih Ni le sual man dantatnak Ni a si!
Jesuh caah a ttha lo: zeica tiah a ttih tukmi thihnak a tuar Ni a si!
Ziah, ho ca hmanh i atthat ttung lo ahcun a tthami "Good" kan ti kun?
"Good Friday" timi ah "Good" biafang hi "thil ttha,thil ttha lo" timi "ttha" sawhsawh caah siloin "a thiangmi (holy), upat a tlakmi Ni" timi sullam tu a ngei! Cucaah "good friday" thoktu hna nih an chim duhmi cu "a thiangmi ninga Ni, upat awk a simi Ni" ti lei deuh khi a si.
Jesuh thihnak cu ho ca hmanh ah "a tthami" cu a siloin "a herhmi" a si caah Pathian ca zong ah a harsa tuk i Jesuh ca zong ah a harsa tuk nain Jesuh Khrih thihnak dah ti lo, misual pawl anmah thi ttung loin tthahnak lam dang a um lo caah an tuahmi a si!
Misual hna nih khamhnak kan hmuh khawhnak hnga, a thiang tukmi le sual ngeilo Jesuh nih Biakam Hlun tlangbawi nih an rak tuah bantuk in, a thiangmi raithawinak amah thisen hrimhrim a pek Ni a si caah, hi Ni hi Ni thiang Ni a si! A thiangmi raithawinak pek Ni a si!
Khrih khamhnak a co rih lomi vialte nih, Pathian dawtnak le Khrih dawtnak a nganzia kan hngalh i amah lei ah kan kir Ni si hram seh!
By
Hrambik Lian
No comments:
Post a Comment