Kan phanhnak ramkip ah, Khua le Peng Tlang Hawikomhnak Buu kan ngei hna i harnak ton caan tete zong ah tthawng ngai in kan i zohkhenh khawhmi hmuh tik ah lung a hmui ngaingai ko.
Miphun dang le ramdang ah, mah phun hawi mithmuh ah a tlaumi minung, chungkhar le Khua si a fawite caah ka lungsia herh bia tete hun langhter ta ka duh. Lungfim tein hun ka rel piak cio hram u..
1. Chungkhar khuasaknak ah thazaang chuah a duh lomi le aa tlangtla duh lomi Minung cu chungkhar nih Mitlau ah kan ruah hna.
Zeitluk kan fim le kan rum zong ah, chungkhar kong ah ruahnak chuah, thazaang chuah le ttanlak aa tim lomi unau cu, chungkhar nih mitlau ah kan ruah ko hna.
Minung a simi poh nih chungkhar kan kan ngei dih, kan chungkhar caah kan ti khawh tawk ruahnak le thazaang chuah hi kan rian a si lawng siloin chungkhar member khat le khat i pehtlaihnak, i dawtnak le tlaihchannak langhtertu zong a si caah, a biapi ngaingai.
Chungkhar nih Mitlau ah ruahmi si hnu ahcun rum zong a nuam kho ti lo, ngaihchiat caan zong ah tuar a fak chun.
Cucaah chungkhar ah tlau hna hlah u sih, chungkhar nih mitlau ah ruahmi kan si sualnak hnga lo, chungkhar khuasaknak caah ruahnak le thazaang chuah peng i zuam ko u sih.
2. Khua Hawikomhnak (Khua fellowship) ah aa tel lomi le thazaang chuah a duh lomi Chungkhar cu Khuami nih Chungkhar tlau ah kan ruah hna!
US kan um zong ah, Australia kan um zong ah, Malay kan um zong ah, India kan um zong ah, zei ram zei khua i kan um zong ah Khua Felkowship ah i tel a duh lomi le thazaang, ruahnak chuah a duh lomi cu Khua hawi nih Chungkhar tlau ah kan ruah dih hna.
Kanmah nih kan tlau lo kan ti zong ah, mitlau ah an kan ruah ahcun mitlau kan si ko. Tlau timi hi "um ti lo, hmuh ti lo" lawng siloin Khua hawi lungthin ah tlau, hmunhma ngeih ti lo khi a si ko.
Cucaah kan miphun cu kan umnak ramkip ah Khua hawi nih mitlau tiah an kan ruah sualnak hnga lo, Chungkhar kip nih Khua Fellowship ah i tel i thazaang le ruahnak chuah peng i zuam ko hna u sih, tiah sawm kan duh hna.
Khua hawi nih Chungkhar Tlau ah ruah cang hnu cu, ka tlau lo ti len zong ah a ngah ti lo. Khuami lungthin ah nan chungkhar nih hmunhma a ngeih ti lo ahcun, chungkhar vanchia taktak nan si!
3. Pengtlang Fellowship ah aa tel duh lomi le thazaang chuah a duh lomi Khua cu Peng Tlang nih Khua Tlau ah ruah kan si!
Peng Tlang fellowship ah i tel a duh lomi Khua cu Peng mit ah Khua Tlau kan si! Peng nih "khi hna khua khi cu aaa pehtlaih timh ti lo ding" an ti hnu ahcun a dih ko.
Thil lian ngan kan tuah zong ah Peng Tlang nih lawmhpi lomi Khua si ahcun tthawn man ngei lo ko a lo!
Zeitluk kan i dawh zong ah hohmanh nih a kan hmuh bal lo ahcun, zeidah san a tlai?
Zeitluk kan tthawn zong ah, a tthawng lomi Khua nih kan tthawn man an hmuh lo ahcun zeidah san a tlai?
Zeitluk rawl chun ka thiam zong ah hohmanh nih an ei bal lo ahcunzeidah san a tlai?
Cucaah kan umnak ramkip ah, bi tuk in khua kan ruat sual lai, ti ka phang ngaingai.
Chungkhar kan i dawtnak le kan tthawnnak theipar cu Khua nih a hmuh awk a si. Khua kan i dawhnak le tthawnnak theipar cu Peng Tlang nih a hmuh awk a si i Peng Tlang kan i dawtnak le tthawnnak cu Miphunpi nih a hmuh awk a si ve. Miphunpi kan i dawtnak le kan tthawnnak cu Rampi nih a hmuh awk a si.
Cucaah Chungkhar dawtnak biapi ah kan chiah bantuk in, Khuapi dawtnak zong biapi ah kan chiah a herh i Khua dawtnak biapi ah kan chiah bantuk in Peng Tlang dawtnak zong biapi ah kan chiah ve a herh. Peng Tlang dawtnak nih miphun dawtnak a hrin awk a si lai..i palh sual hrimhrim.hlah u sih law...
An nih Khua i zeirel lo cu zeihmanh ah ka rel lo, an nih Peng i zeirel lo cu zeihmamh ah ka rel lo, timi lungput hi Satan hlennak a si! A ho zeirel lo poah hi a fak tuk ah ruah i ahohmanh zei rel lo awk hmanh in um lo khi kan i zuam.cio awk rian cu a si!
Khua kan dawtnak nih Khua dang ralnak siloin Khua dang caah theipar a chauhter awk a si. Peng Tlang dawtnak nih Peng dang ralnak siloin miphun caah theipar tu a chuahpi awk a si.
Khua kip le Peng Tlang kip nih, Peng Tlang cherhchan hruainak phung (community based leadership policy) kan fian, kan dirkamh i Dawtnak he kan kalpi lawnglawng ah Miphun ah thlennak a chuak kho lai....
Nan u nau,
Hrambik Lian
No comments:
Post a Comment