Nau Hrawh Hmang Pawl Hi Pathian Nih Zeitindah A Tuah Hna Lai?

Part III

Nau Hrawh Cu Phun Tampi In Baibal Nih Sual A Phawt:

1.  Nu Paw Chungnau Hrawh Cu Sualnak Ngeilo Thisen Chuah A Si:

Deutronomy 27:25 “Sual palhnak ngei lomi thisen chuahtu cu, chiat si seh” tiah kan hmuh. Nu paw chungnau tluk in sualpalhnak ngei lomi ho tal an um hnga maw? Cucaah sual-palhnak ngei lomi nu paw chungnau hrawh cu Pathian nih sual a phawt!

2. Nu Paw Chungnau Hrawh Cu Jesuh Pekmi Sui Phung He Aa Kalh:

Matthew 7:12 “Midang nih ka cungah tuah hna seh, ti na duh bantuk in, midang cung zongah va tuah ve,” tiah kan hmuh. Kan mah lakah hin, nung pa hrim in thih si pek, lu hmeh-that, le rialdip cu a duhmi kan um hnga maw? Ahohmanh kan um lai lo. Nun tial mal kan duh dih cio. Cucaah nunnak tling a ngei ve mi paw chungnau thah cu, mi dang zong nih kan cungah an tuah dingah kan duh bak lomi a si caah, kan ngol awk a si.

3. Nu Paw Chungnau Hrawh Cu Pathian Thiltuahmi Hrawhpiak A Si:

Khrihfa catial thiam Rick Warren nihcun “Nu le pa nih accident in fa hrin khawh a si sihmanhsehlaw zeibantuk fa hmanh accident in a chuak lo: an chuah cu Pathian tinhmi ning in a si”, tiah a ti. Na paw chungnau aa sem khawh kha Pathian nih a onh caah a si. Cucaah aa sem cangmi nau hrawh cu, Pathian program hrawh he aa khat.

4. Nu Paw Chungnau Hrawh Cu Ningzahnak le Ngaichihnak Chuahtertu A Si:

Nau aa hrawk mi 100 lakah minung 99% cu an i ngaichih, tiah cithlattu hna nih an chim. Ngakchia an hmuh poah ka fa kha rak hrawk hlahning law, zeitluk dah a hai si ve cang hnga? etc. bantuk ruahnak an lungah a chuak peng, ti a si.  Nau aa hrawh balmi na si ahcun hun iruat ve hmanh. Ngaichihnak te na ngeih caan cu a um hrimhrim lai. Ngaichihnak lawng siloin hohmanh nih theihpi lomi chung nun ah, sual phuhrunnak an ngei peng, ti a si. Sual phuhrunnak ngeih cang hnu ahcun Pathian leiah ral tha tein kar hlan khawh a si ti lo. Satan rap nih an foih cang! Baibal nih hi dirhmun hi phanhter a kan duh bak lomi a si. Cucaah a caan luan hlan teah kan hrial a hau!

5. Nu Paw Chungnau Hrawh Cu Minung Nunnak Man Zeirel Lo A Si:

Pathian nih hin minung kan nunnak man hi a sang tuk ah a chiah zeicatiah minung a mah muisam kengin sermi kan si. Biakam Hlun a Nawlbia kan zoh tikah “mi dang a thattu cu thah si ve seh”, (Exo. 21:12; Num. 35) tiah kan hmuh. Hi tluk in a ngeitu Pathian nih man sangah a chiahmi nau nunnak hrawh cu Pathian nih nih man sung tukah a ruahmi man ngei loah va tuah khi a si. Baibal nih a duh bak lo!

6. Nu Paw Chungnau Hrawh Cu Dawtnak Lungthin Ngeih Lo A Si:

2 Timothy 3:3 ni donghnak ni misual pawl kong chimnak kan zoh tikah “Ni donghnak ahcun zangfahnak le zawnruahnak lungthin a ngei lomi an chuak te lai”, tiah a chimmi kan hmuh. Hihi holh dang ahcun natural affection/love tiah a ti. A sullam cu nuhrinnak le kan minung sinak hrimhrim in kan ngeih awk asimi dawtnak/zangfahnak khi a si. Cucaah mah thisen chungin aa semmi nau tthah cu, minung nih a ngeih awk asimi dawtnak lungthin ngeih bak lo khi a si ko.

7. Nu Paw Chungnau Hrawh Nih Sualnak Phun Dang A Karhter:

Nungak pakhat nih accident in nau a pawi sualmi  a hrawh tikah a hung zultu ding sualnak cu lakfa dang pawi tthan i ihrawh tthan, nupa sualnak phunphun tuah chapnak le uiretnak phunphun a chauhtertu a si. Nu tung pawl nih an paw chungnau an thah tikah pasal he tthennak tiang a chuahpi khawh etc. Cucaah Nu Paw Chungnau Hrawh Cu sualnak karhter riantuan zong a si fawn.

8. Nu Paw Chungnau Hrawh Cu Zumhnak Ngeih Lo A Si:

Rome 14:23 “Zumhnak in tuah lomi poah cu sual a si”, tiah kan hmuh. Cun Hebrew 11:6 ah “Zumhnak tel lo in Pathian lungton khawh a si lo” tiah kan hmuh tthan. Nangmah nihcun ka si a fak tuk ruangah nau cawn kho ding ka si lo, hrawk ko ning, nau ngeih ka duh rih lo nain ruah lopi in nau kan cuang sual, tbk. in a phunphun chuanlam ser awk na ngeih ko lai. Zeibantuk chuanlam hmanh va ser law na pawi cangmi nau tthah tiang na phakmi tu cu zumhnak na ngeih lo caah a si ko. Cucaah kan mah leikap harnak le lungretheihnak ruangah, Pathian program in, kan pawi cangmi nau kan thah ahcun kan nau nunnak ngeitu Pathian, zeihmanh ah kan rel lo bak a si ko.

 Nan harsat tuk ruangah nau hrawh naa timh sual ahcun Pathian a mah aa bochan ngammi hna caah biakamnak a sermi kha philh hna hlah. Ram lak zu le va hmanh a venghimtu Pathian kan ngei hih! Nau pawi ka duh rih lo nain ruah lopi in ka pawi sual caah kaa hrawh lai, timi ruahnak a ngeimi hna nan um sual maw? Nangmah na duh rih lo ruangah cun maw, Lai cu na nawn ko hnga? Na pawi cangnau nunnak na hmaizahnak le zangfahnak  nih khan na duhnak cu a tei awk a si. Ka tlangval he tthitum loin kan pawi sualmi a si caah kaa hrawh lai, tiah khua ruatmi nan um sual maw? Thitumhnak biakam loin nupa sualnak ruangah na sualnak kha ingaichih i sualngaihthiamnak tu hal loin maw, a ngan chinchin mi Lai nawn sualnak cu naa chap lai? Nangmah hna thianak ruah ahcun maw na paw chung nau cu na hai thah men ko hnga! Na thah ahcun na chan chung sual phuhrunnak le ningzahnak nih an zulh peng cang lai. 

Na sualnak ingaichih in thlacam law,  na tlangval pa kha rak ka thi, tiah tha tein nawl ko. An tthit ahcun a tha sihmanhsehlaw an tthit duh lo ahcun, zumhnak in na fa cu nangmah tein hring ko. Cucu Pathian hmai ah kan palhsual mi thil ruangah dantatnak in ngamnak zumhnak, ti khawh a si ve. Minung hmai ningzahnak nak in Pathian hmaizahnak kha hmai na sakter/tih deuh caah Pathian nih  thlauchuah an pek ko lai.

Asi ahcun, tutan capar rel hlan ah nau aa hrawk cangmi hna pawl tah, zeitindah nan si kun lai? Pathian nih zeitindah an tuah hna lai?

A sual lio bakah an tlaih minu, Judah mipi nih sual an phawt lioah khan Jesuh nih zeitindah a rak leh hna kha?

John 8:11 ahcun “mi nu, sual an phawtu cu an um ti khun lo maw? Kei zong nih sual kan phaw ve lo. Kal law, hi hnu cu va sual ti hlah” tiah Jesuh nih a sual lioah an tlaihmi nu sinah, a timi kan hmuh. “Hi hnu” timi hi mirang ahcun “from now on” tiah a ti. A sawh duhmi cu Jesuh he an iton caan thok khan…sual ti lo ding, tinak a si. Cucaah dawtmi u le nau hna hi tluk taitai in sual ngan a rak si na rak hngalh lo ruangah na tuahmi zong a si kho men sihmanhsehlaw hi capar na rel caan thok cun na hngalh fian cang caah, na tuah cangmi kongah ngaichihnak he Pathian sinah ngaihthiam hal law, hi hnu in ka nun chung ka tuah bal ti lai lo, tiah Pathian sinah biakamnak tuah colh ve hmanh. Na thlau cangmi lunglawmhnak na sinah, a kir tthan lai!